ఆరోగ్యం బలహీనపడటంతో తన విధులు నిర్వర్తించడం కష్టంగా మారిందంటూ జపాన్‌ చక్రవర్తి అకిహిటో(82) ఆందోళన వ్యక్తం చేశారు. వయసు అడ్డంకిగా మారిందనీ, శరీరక ఆరోగ్యానికి సంబంధించిన పరిమితులు ఎదురవుతున్నాయని పేర్కొన్నారు. జాతిని ఉద్దేశించి చేసిన వీడియో ప్రసంగంలో ఈ వ్యాఖ్యలు చేశారు. పదవీ పరిత్యాగానికి సంబంధించిన ప్రస్తావనేదీ చేయకపోయినా.. భవిష్యత్తులో పదవిని త్యజించడానికి సంకేతాలుగా ప్రభుత్వ వర్గాలు భావిస్తున్నాయి. దీనిపై ప్రధాని షింజో అబే వెంటనే స్పందించారు. చక్రవర్తి వ్యాఖ్యల్ని ప్రభుత్వం తీవ్రంగా పరిగణిస్తుందన్నారు. చక్రవర్తి విధులు, ఆరోగ్యం, పని ఒత్తిడి వంటివన్నీ దృష్టిలో ఉంచుకొని ఏం చేయాలనేది యోచిస్తామన్నారు. మరి కొన్నేళ్లలో తాను పదవి నుంచి వైదొలగనున్నట్లు సన్నిహితులతో పేర్కొన్నట్లు గత నెలలోనే పలు కథనాలు వెలువడ్డాయి. ఇది ఆధునిక జపాన్‌ చరిత్రలో మునుపెన్నడూ లేని పరిణామంగా భావిస్తున్నారు. చక్రవర్తి అభిప్రాయంపై సామాన్య ప్రజల్లో విస్తృత మద్దతు ఉన్నట్లు సర్వేల్లో వెల్లడైంది.