రియాద్: ప్రమాదాలలో దెబ్బతిన్న వాహనాలకు పూర్తి నష్టపరిహారాన్ని చెల్లించే విషయానికి సంబంధించి సౌదీ సెంట్రల్ బ్యాంక్ (SAMA) కీలక సూచనలు చేసింది. ఆర్థిక నష్టాలకు సంబంధించి సౌదీ అథారిటీ ఫర్ అక్రిడిటెడ్ వాల్యూయర్స్ (తకీమ్) ద్వారా లైసెన్స్ పొందిన అప్రైజల్ సంస్థలు జారీ చేసిన నివేదికలను తప్పనిసరిగా ధృవీకరించుకోవాల్సిన అవసరం ఉందని స్పష్టం చేసింది.  అన్ని బ్యాంకులు, ఆర్థిక సంస్థలు మరియు ఫైనాన్స్ కంపెనీలకు ఈ మేరకు ఒక సర్క్యులర్‌ పంపినట్లు సెంట్రల్ బ్యాంక్ తెలిపింది. ఫైనాన్సింగ్ సంస్థ తప్పనిసరిగా అన్ని సంబంధిత పక్షాల సమన్వయంతో తగిన చర్యలు తీసుకోవాలని సూచించింది.  
ఆర్థిక సంస్థల ఖాతాదారులు ఎదుర్కొంటున్న సవాళ్లను పర్యవేక్షించడానికి మరియు పరిష్కరించడానికి తమ నిరంతర ప్రయత్నాలలో ఈ సర్క్యులర్ ఒక భాగమని సెంట్రల్ బ్యాంక్ పేర్కొంది. ఫైనాన్షియల్ లీజింగ్ చట్టంలోని ఆర్టికల్ 22ను అమలు చేసే ప్రయోజనాల కోసం, తకీమ్ ద్వారా లైసెన్స్ పొందిన అప్రైజల్ సంస్థలు జారీ చేసిన నివేదికలను తప్పనిసరిగా ధృవీకరించాలని సెంట్రల్ బ్యాంక్ స్పష్టం చేసింది.
లీజుకు తీసుకున్న వాహనం పూర్తిగా డ్యామేజీ అయితే ఒప్పందం రద్దు చేయబడుతుందని తెలిపింది.  ఒకవేళ లీజుకు తీసుకున్న వెహికల్, ఇకపై ఉపయోగించలేని విధంగా పాక్షికంగా ధ్వంసమైతే, మరియు లీజుకు ఇచ్చిన వ్యక్తి సహేతుకమైన కాలవ్యవధిలోగా  దానిని పూర్వస్థితికి పునరుద్ధరించకపోయినా లేదా లీజుకు తీసుకున్న వ్యక్తికి ఆమోదయోగ్యమైన, అలాంటిదే మరో వాహనంతో దానిని భర్తీ చేయకపోయినా, లీజుకు తీసుకున్న వ్యక్తి ఒప్పందాన్ని రద్దు చేసుకోవచ్చు లేదా లీజుకు ఇచ్చిన వ్యక్తితో ఒప్పందాన్ని కొనసాగించడానికి అంగీకరించి, వాహనం పాక్షికంగా ధ్వంసమైన విషయాన్ని ప్రతిబింబించేలా అద్దెను సర్దుబాటు చేసుకోవచ్చని పేర్కొంది. ఒకవేళ ఒప్పందం దాని ప్రస్తుత రూపంలో కొనసాగితే, మరమ్మత్తుల కాలంలో లీజుకు ఇచ్చిన వ్యక్తి, లీజుకు తీసుకున్న వాహనం విలువకు తక్కువ కాని విలువ కలిగిన మరో వాహనంతో లీజుకు తీసుకున్న వ్యక్తికి నష్టపరిహారం చెల్లిస్తే తప్ప, ఆ కాలానికి ఎటువంటి అద్దె చెల్లించాల్సిన అవసరం లేదని సర్క్యులర్ లో సెంట్రల్ బ్యాంకు నిర్దేశించింది.