మనామా: ప్రాంతీయ భద్రతా ఉద్రిక్తతలు కొనసాగుతున్న దృష్ట్యా, బహ్రెయిన్ పౌరులు ఇరాన్ మరియు ఇరాక్‌లకు వెళ్లడంపై తాత్కాలిక నిషేధాన్ని విధించింది. ఈ మేరకు  అంతర్గత వ్యవహారాల మంత్రిత్వ శాఖ ప్రకటించింది. ప్రస్తుతం మిడిలీస్టులో నెలకొన్న భద్రతా పరమైన ఉద్రిక్తతల నేపథ్యంలోనే ఈ నిర్ణయం తీసుకున్నట్లు మంత్రిత్వ శాఖ ఒక ప్రకటనలో పేర్కొంది. జాతీయ భద్రతను పరిరక్షించేందుకు, బహ్రెయిన్ పౌరుల భద్రతను నిర్ధారించే ప్రయత్నాలలో భాగంగానే ఈ చర్యను చేపట్టినట్లు తెలిపింది. తదుపరి ఆదేశాలు వెలువడే వరకు ఈ ప్రయాణ నిషేధం అమలులో ఉంటుందని పేర్కొంది. ఈ నిర్ణయాన్ని ఉల్లంఘించిన వారిపై చట్టపరమైన చర్యలు తీసుకుంటామని అధికారులు హెచ్చరించారు.