ఇరాక్‌ రాజధాని బాగ్దాద్‌లో దారుణం జరిగింది. ఓ ఆసుపత్రిలో అగ్నిప్రమాదం జరగడంతో 11 మంది నెలలు నిండని పసివారు సజీవదహనమయ్యారు. అధికారులు తెలిపిన వివరాల ప్రకారం..స్థానిక యార్‌మౌక్‌ ప్రసూతి ఆసుపత్రిలో బుధవారం ఉదయం అగ్నిప్రమాదం జరిగింది. నెలలు నిండకుండానే పుట్టి ఆసుపత్రి ఇంక్యుబేటర్‌లో చికిత్స పొందుతున్న 11 మంది పసిబిడ్డలు ఈ ఘటనలో సజీవదహనమయ్యారు. అప్రమత్తమైన అధికారులు ఏడుగురు చిన్నారులు, 29 మంది మహిళలను రక్షించి మరో ఆసుపత్రికి తరలించారు. విద్యుత్‌ సరఫరాలో లోపం వల్ల ప్రమాదం జరిగి ఉంటుందని ఆరోగ్యశాఖ అధికారులు భావిస్తున్నారు. ఘటనపై పూర్తి వివరాలు తెలియాల్సి ఉంది.