కువైట్: కువైట్ లో ఈ వారాంతంలో పగటిపూట, ముఖ్యంగా తీర ప్రాంతాలలో వేడి మరియు తేమతో కూడిన వాతావరణం ఉంటుందని వాతావరణ శాఖ తెలిపింది.  ప్రస్తుతం ఉపరితల అల్పపీడనం  విస్తరించే దశలో ఉందని, దీనితో పాటు వేడి మరియు తేమతో కూడిన గాలుల తీవ్రత అధికంగా ఉంటుందని వాతావరణ శాఖ తాత్కాలిక డైరెక్టర్ అబ్దుల్ అజీజ్ అల్-ఖరావి తెలిపారు. పగటిపూట వాతావరణం చాలా వేడిగా ఉంటుందని హెచ్చరించారు. గరిష్ట ఉష్ణోగ్రతలు 45 నుండి 47°C మధ్య ఉండే అవకాశం ఉందన్నారు. ముద్రపు పరిస్థితులు తేలికపాటి నుండి మధ్యస్థంగా ఉంటాయని, అలల ఎత్తు 1 నుండి 4 అడుగుల వరకు ఉంటుందన్నారు. రాత్రి సమయాల్లో కనిష్ట ఉష్ణోగ్రతలు 26 నుండి 28°C మధ్య ఉండే అవకాశం ఉండగా, సముద్రపు అలలు 1 నుండి 3 అడుగుల వరకు ఉంటాయన్నారు.
ఇక శుక్రవారం ముఖ్యంగా తీర ప్రాంతాలలో, పరిస్థితులు వేడిగా మరియు  తేమగా ఉండే అవకాశం ఉంది. గంటకు 8 నుండి 32 కిలోమీటర్ల వేగంతో గాలులు వీస్తాయి. గరిష్ట ఉష్ణోగ్రతలు 43 నుండి 45°C మధ్య ఉంటాయని,  కనిష్ట ఉష్ణోగ్రతలు 24 నుండి 26°C మధ్య ఉంటాయన్నారు. శనివారం వేడిగా, తేమగా ఉంటుందని, గంటకు 6 నుండి 26 కిలోమీటర్ల వేగంతో తేలికపాటి గాలులు వీస్తాయని అల్-ఖరావి తెలిపారు. గరిష్ట ఉష్ణోగ్రతలు 43 నుండి 45 డిగ్రీల సెల్సియస్ మధ్య నమోదయ్యే అవకాశం ఉందని, కనిష్ట ఉష్ణోగ్రతలు 30 నుండి 32 డిగ్రీల సెల్సియస్ మధ్య ఉంటాయని తెలిపారు.