యూఏఈ: యూఏఈలో నివసిస్తున్న భారతీయులకు అందించే కాన్సులర్ సేవలు జూలై 1 నుండి 'అల్ హింద్ టూర్స్ అండ్ ట్రావెల్స్ LLC' (Alhind Tours and Travels LLC) అనే కొత్త సంస్థకు మారనున్నాయి. ఈ నేపథ్యంలో పాస్‌పోర్ట్, వీసా మరియు ధృవీకరణ (attestation) వంటి సేవలకు సంబంధించిన సాధారణ అపాయింట్‌మెంట్‌లను జూన్ నెలలో కొంతకాలం పాటు నిలిపివేస్తున్నట్లు ఇండియన్ ఎంబసీ ప్రకటించింది. ఈ మార్పు యూఏఈలోని సుమారు 35 లక్షల మందికి పైగా ప్రవాస భారతీయుల కాన్సులర్ సేవలపై ప్రభావం చూపనుంది. అబుదాబి, దుబాయ్ మరియు ఫుజైరా వంటి ప్రధాన కేంద్రాలతో సహా మొత్తం ఏడు ఎమిరేట్‌లలో 16 ప్రత్యేక కేంద్రాలను ప్రారంభించాలని అల్ హింద్ సంస్థ  యోచిస్తోంది.
ప్రస్తుతం యూఏఈలో సేవలు అందిస్తున్న BLS ఇంటర్నేషనల్ (పాస్‌పోర్ట్ మరియు వీసా సేవలు) మరియు SGIVS గ్లోబల్ (ధృవీకరణ సేవలు) సంస్థలు జూన్ 25 నుంచి కొత్త దరఖాస్తులను స్వీకరించడం ఆపివేయనున్నాయి. జూన్ 26 నుండి 30 మధ్య ప్రజలకు సాధారణ అపాయింట్‌మెంట్‌లు అందుబాటులో ఉండవని ఈ సందర్భంగా భారత రాయబార కార్యాలయం తెలిపింది. అయితే, అత్యవసర కాన్సులర్ సేవలను (పాస్‌పోర్ట్, వీసా మరియు ధృవీకరణ) అబుదాబిలోని భారత రాయబార కార్యాలయం మరియు దుబాయ్‌లోని భారత కాన్సులేట్ జనరల్ నేరుగా నిర్వహిస్తాయని స్పష్టం చేశారు. అత్యవసర పరిస్థితులు ఉన్నవారు టోల్-ఫ్రీ నంబర్ - 800 46342 (800 INDIA), వాట్సాప్ - +971 54 309 0571, ఈమెయిల్ - [email protected] ద్వారా సంప్రదించాలని సూచించారు. జూలై 1 నుండి కాన్సులర్ సేవల కోసం కొత్త అపాయింట్‌మెంట్ పోర్టల్‌ను 'అల్ హింద్ టూర్స్ అండ్ ట్రావెల్స్ LLC' త్వరలో ప్రారంభించనుంది.

అల్ హింద్‌కు బదిలీ
అల్ హింద్ టూర్స్ & ట్రావెల్స్ అనేది 'అల్ హింద్ గ్రూప్ ఆఫ్ కంపెనీస్'లో ఒక భాగం. ఈ గ్రూప్‌నకు ఐటీ సాఫ్ట్‌వేర్, లగ్జరీ అద్దె సేవలు మరియు విదేశీ మారకం (foreign exchange) వంటి రంగాలలో వ్యాపార కార్యకలాపాలు ఉన్నాయి. 1992లో  కేరళలో స్థాపించబడిన ఈ సంస్థ, 1995లో యూఏఈ మరియు ఇతర మధ్యప్రాచ్య దేశాలలో తన కార్యకలాపాలను ప్రారంభించింది. ఈ గ్రూప్ అబుదాబి, దుబాయ్ మరియు ఫుజైరాలలో ప్రధాన కేంద్రాలతో సహా ఏడు ఎమిరేట్స్‌లో 16 ప్రత్యేక కేంద్రాలను ప్రారంభించాలని యోచిస్తోంది. వీటిలో అతిపెద్ద కేంద్రం బుర్ దుబాయ్‌లో ఏర్పాటు కానుంది.