మస్కట్: ఒమన్ అంతటా వేసవి ఉష్ణోగ్రతలు పెరుగుతున్నందున, ఆరోగ్య మంత్రిత్వ శాఖ ప్రజలలో అవగాహన కార్యక్రమాలను ముమ్మరం చేసింది. ముఖ్యంగా తీవ్రమైన ఆరోగ్య సమస్యలు ఉన్నవారు వడదెబ్బ నుండి రక్షణ కోసం నివారణ చర్యలు తీసుకోవాలని కోరింది. ఆరోగ్య మంత్రిత్వ శాఖలోని పాఠశాల మరియు విశ్వవిద్యాలయ ఆరోగ్య కార్యక్రమాల విభాగాధిపతి డాక్టర్ షమ్సా అల్ హర్తి మాట్లాడుతూ.. వేసవి కాలంలో పెరుగుతున్న ఉష్ణోగ్రతల దృష్ట్యా, వేడి సంబంధిత అనారోగ్యాలను నివారించడానికి మరింత అప్రమత్తంగా ఉండాలని అన్నారు.

ముఖ్యంగా 65 ఏళ్లు మరియు అంతకంటే ఎక్కువ వయస్సు ఉన్న వృద్ధులు, శిశువులు మరియు నాలుగేళ్లలోపు పిల్లలు, నేరుగా సూర్యరశ్మికి గురయ్యే బహిరంగ కార్మికులు, ఎయిర్ కండిషనింగ్ లేని మూసి ఉన్న ప్రదేశాలలో పనిచేసే ఉద్యోగులు మరియు పర్యాటకులు వడదెబ్బకు ఎక్కువగా గురయ్యే అవకాశం ఉందని తెలిపారు. అధిక ఉష్ణోగ్రతల సంబంధిత అనారోగ్యాలను సకాలంలో గుర్తించి, చికిత్స చేయకపోతే అవి ప్రాణాంతకంగా మారవచ్చని వివరించారు. చెమట పట్టడం, తీవ్రమైన అలసట, తలనొప్పి, వికారం, వాంతులు, కళ్ళు తిరగడం, తీవ్రమైన దాహం, కండరాల నొప్పులు, గుండె వేగంగా కొట్టుకోవడం, శరీర ఉష్ణోగ్రత 38 నుండి 39.5 డిగ్రీల సెల్సియస్ మధ్య ఉండటం వంటి లక్షణాలు ఉంటే వెంటనే వైద్యసహాయం పొందాలని సూచించారు.  

వేడి వాతావరణంలో ఉండే వ్యక్తులు రోజంతా క్రమం తప్పకుండా నీరు త్రాగాలని, అధిక ఉష్ణోగ్రతలలో బయట ఉన్నప్పుడు ప్రతి గంటకు రెండు నుండి నాలుగు కప్పుల నీరు తాగాలని డాక్టర్ అల్ హర్తి సూచించారు. అదే సమయంలో డీహైడ్రేషన్‌కు కారణమయ్యే అధిక స్థాయిలో కెఫీన్ లేదా చక్కెర ఉన్న పానీయాలకు దూరంగా ఉండాలన్నారు.