హైదరాబాద్: సైబర్ నేరాల నియంత్రణ, దర్యాప్తు, బాధితులకు సేవలందించడంలో తెలంగాణ పోలీసులు దేశంలోనే మొదటి స్థానాన్ని సాధించారు. ప్రధానమంత్రి కార్యాలయం (PMO) ఆధ్వర్యంలో నిర్వహించిన దేశవ్యాప్త ప్రగతి (PRAGATI) సమీక్షలో తెలంగాణ పోలీసుల పనితీరుకు అత్యుత్తమ ర్యాంక్ లభించింది.

కేంద్ర హోం మంత్రిత్వ శాఖ పరిధిలోని ఇండియన్ సైబర్ క్రైమ్ కోఆర్డినేషన్ సెంటర్ (I4C) రూపొందించిన సైబర్ నేరాల నిరోధక వేదికల అమలు, వినియోగాన్ని ఆధారంగా చేసుకుని ఈ సమీక్ష నిర్వహించారు. మొత్తం తొమ్మిది కీలక ప్రమాణాలపై తెలంగాణ అత్యుత్తమ ప్రదర్శన కనబర్చి దేశంలో అగ్రస్థానంలో నిలిచింది.

ఈ ప్రమాణాల్లో స్టేట్ సైబర్ క్రైమ్ కోఆర్డినేషన్ సెంటర్ (S4C) ఏర్పాటు, ఈ-జీరో ఎఫ్‌ఐఆర్ (e-Zero FIR) వ్యవస్థ అమలు, గ్రీవెన్స్ రెడ్రెసల్ మెకానిజం (GRM), మనీ రీస్టోరేషన్ మాడ్యూల్ (MRM), సహయోగ్ పోర్టల్, సమన్వయ పోర్టల్ సమర్థ వినియోగం, సైబర్ నేరాల హాట్‌స్పాట్ల గుర్తింపు, పోలీసు సిబ్బందికి శిక్షణ, ప్రజల్లో అవగాహన కల్పించడం వంటి అంశాలు ఉన్నాయి.

తెలంగాణ సైబర్ సెక్యూరిటీ బ్యూరో (TGCSB) ప్రకారం, దేశంలోనే తొలిసారిగా S4Cను ఏర్పాటు చేయడం, e-Zero FIR వ్యవస్థను విజయవంతంగా అమలు చేయడం, అలాగే సమన్వయ, సహయోగ్, GRM, MRM వంటి I4C వేదికలను సమర్థవంతంగా వినియోగించడం పట్ల కేంద్రం ప్రత్యేకంగా ప్రశంసించింది.

ప్రజలకు మరింత సులభంగా సేవలు అందించేందుకు 8712665600 అనే ప్రత్యేక హెల్ప్‌లైన్‌ను తెలంగాణ సైబర్ సెక్యూరిటీ బ్యూరో ప్రారంభించింది. GRM, MRMలకు సంబంధించిన ఫిర్యాదుల పరిష్కారానికి ఈ హెల్ప్‌లైన్ ఉపయోగపడుతుంది. అలాగే ఈ పోర్టళ్ల వినియోగంపై అవగాహన కల్పించేందుకు అధికారిక సోషల్ మీడియా వేదికల్లో సూచనాత్మక వీడియోలను కూడా విడుదల చేసింది.

ఆగస్టు 2 నాటికి GRM ద్వారా అందిన 2,368 ఫిర్యాదుల్లో 2,086 ఫిర్యాదులను పరిష్కరించి 88 శాతం డిస్పోజల్ రేటు నమోదు చేసింది. మనీ రీస్టోరేషన్ మాడ్యూల్ ద్వారా ₹16.42 కోట్ల విలువైన 34,524 లావాదేవీలు రీఫండ్‌కు అర్హమైనవిగా గుర్తించగా, వాటిలో 28,097 కేసుల్లో చట్ట అమలు సంస్థలు చర్యలు తీసుకుని 81.38 శాతం అమలు రేటు సాధించాయి.

ఒక్కో లావాదేవీలో ₹50,000 వరకు మోసపోయిన బాధితులు ఎఫ్‌ఐఆర్ లేదా కోర్టు ఉత్తర్వులు లేకుండానే నేరుగా రీఫండ్ పొందే అవకాశం కల్పించగా, అంతకంటే ఎక్కువ మొత్తాలకు ఎఫ్‌ఐఆర్‌తో పాటు కోర్టు ఆదేశాలు అవసరమని అధికారులు తెలిపారు.

సహయోగ్ పోర్టల్ ద్వారా చట్టవిరుద్ధమైన కంటెంట్‌కు సంబంధించిన 22,447 యూఆర్‌ఎల్‌లలో 20,070 యూఆర్‌ఎల్‌లను తొలగించి లేదా నిలిపివేసి 89.41 శాతం విజయశాతం నమోదు చేసింది. అలాగే సమన్వయ పోర్టల్ ద్వారా ఇతర రాష్ట్రాల నుంచి వచ్చిన 6,721 దర్యాప్తు సహాయ అభ్యర్థనల్లో 6,518 పూర్తి చేయగా, తెలంగాణ పంపిన 7,018 అభ్యర్థనల్లో 5,560 పరిష్కరించబడినట్లు TGCSB వెల్లడించింది.

సాంకేతిక పరిజ్ఞానాన్ని సమర్థవంతంగా వినియోగిస్తూ, బాధితులకు వేగవంతమైన సేవలు అందించడం, సైబర్ నేరాలపై సమర్థ పోరాటం కొనసాగించడం వల్లే తెలంగాణ పోలీసులు ఈ జాతీయ గుర్తింపును సాధించినట్లు అధికారులు పేర్కొన్నారు.