షార్జా: ఇరాన్ యుద్ధం కారణంగా ప్రభావితమైన వ్యాపార రంగాల పునరుద్ధరణకు షార్జా ప్రభుత్వం ప్రత్యేక ఆర్థిక ఉపశమన ప్యాకేజీని ప్రకటించింది. విద్య, ఆహార, ఔషధ రంగాలతో పాటు చిన్నతరహా వ్యాపారాలను ఆదుకునే లక్ష్యంతో ఈ ప్రోత్సాహక చర్యలను అమలు చేస్తున్నట్లు అధికారులు వెల్లడించారు.

జూన్ 16 నుంచి అమల్లోకి వచ్చిన ఈ పథకం మూడు నెలల పాటు కొనసాగనుంది. షార్జా ఎకనామిక్ డెవలప్‌మెంట్ డిపార్ట్‌మెంట్ ఆధ్వర్యంలో అమలవుతున్న ఈ ప్యాకేజీలో పలు రకాల ఫీజు రాయితీలు, మినహాయింపులు, చెల్లింపుల వాయిదాలు ఉన్నాయి.

ప్రధాన రాయితీలు ఇవే

• ఆహార, ఔషధ పరిశ్రమల పారిశ్రామిక లైసెన్సులపై 50 శాతం రాయితీ
• ఈ-కామర్స్, హోమ్ బిజినెస్‌లకు సంబంధించిన మైక్రో లైసెన్సుల జారీ, పునరుద్ధరణ ఫీజులపై 50 శాతం తగ్గింపు
• మైక్రో లైసెన్సులపై ఆలస్య రుసుముల పూర్తి మినహాయింపు
• నర్సరీల లైసెన్సుల జారీ, పునరుద్ధరణ ఫీజులపై 25 శాతం రాయితీ
• ప్రచార కార్యక్రమాల అనుమతి రుసుములపై 25 శాతం తగ్గింపు

షార్జా ఎగ్జిక్యూటివ్ కౌన్సిల్ సభ్యుడు, ఎకనామిక్ డెవలప్‌మెంట్ డిపార్ట్‌మెంట్ చైర్మన్ హమద్ అలీ అబ్దుల్లా అల్ మహ్మూద్ మాట్లాడుతూ, ఈ ప్యాకేజీ పెట్టుబడిదారులు, వ్యాపారవేత్తలకు మరింత అనుకూల వాతావరణాన్ని కల్పించి వ్యాపార కార్యకలాపాలను బలోపేతం చేస్తుందని తెలిపారు.

పలు శాఖల సహకారంతో అమలు

ఈ ఆర్థిక ప్రోత్సాహక కార్యక్రమాన్ని షార్జా మున్సిపల్ వ్యవహారాల శాఖ, షార్జా పోలీస్, షార్జా కామర్స్ అండ్ టూరిజం డెవలప్‌మెంట్ అథారిటీ, షార్జా ప్రైవేట్ ఎడ్యుకేషన్ అథారిటీ తదితర ప్రభుత్వ సంస్థల సహకారంతో రూపొందించారు.

దేశవ్యాప్తంగా ఉపశమన చర్యలు

ఇరాన్ యుద్ధం ప్రభావంతో పర్యాటక, ఆతిథ్య రంగాలు తీవ్రంగా దెబ్బతినడంతో యూఏఈలోని వివిధ ఎమిరేట్లు వ్యాపారాలకు మద్దతుగా ప్రత్యేక చర్యలు చేపడుతున్నాయి. గత నెలలో దుబాయ్ ప్రభుత్వం 1.5 బిలియన్ దిర్హామ్‌ల ఆర్థిక ప్రోత్సాహక ప్యాకేజీని ప్రకటించింది. ఇందులో హోటళ్లపై విధించే రాత్రి పన్ను, మున్సిపల్ పన్నులపై తాత్కాలిక మినహాయింపులు ఉన్నాయి.

ఇక అబుదాబి ప్రభుత్వం నివాస, వాణిజ్య, పారిశ్రామిక భవనాల అద్దెల పెంపును తదుపరి ఆదేశాలు వచ్చే వరకు నిలిపివేసింది. పెరుగుతున్న జీవన వ్యయాల నేపథ్యంలో ఈ నిర్ణయం ప్రజలకు ఊరటనిచ్చిందని అధికారులు పేర్కొన్నారు.

యూఎస్-ఇరాన్ శాంతి చర్చలు పురోగమిస్తున్న నేపథ్యంలో ప్రాంతీయ పరిస్థితులు క్రమంగా సాధారణ స్థితికి చేరుకుంటుండగా, ఈ ఆర్థిక ఉపశమన చర్యలు వ్యాపారాల పునరుద్ధరణకు దోహదపడతాయని విశ్లేషకులు అభిప్రాయపడుతున్నారు.