భారతీయుల కోసం ప్రత్యేక హెల్ప్‌లైన్ నంబర్లు విడుదల

దోహా: ఖతార్‌లోని రాస్ లాఫాన్ ఇండస్ట్రియల్ సిటీలో ఇటీవల చోటుచేసుకున్న పారిశ్రామిక ప్రమాదంపై భారత రాయబార కార్యాలయం స్పందించింది. ఈ ఘటనలో పలువురు గాయపడగా, మరికొందరు గల్లంతైనట్లు ఖతార్ అధికారులు వెల్లడించిన నేపథ్యంలో భారత రాయబార కార్యాలయం తీవ్ర ఆందోళన వ్యక్తం చేసింది.

ఈ దుర్ఘటన నేపథ్యంలో ఖతార్ ప్రభుత్వం, అక్కడి ప్రజలకు భారత రాయబార కార్యాలయం తన సంఘీభావాన్ని ప్రకటించింది. ప్రమాదంలో గాయపడినవారు త్వరగా కోలుకోవాలని, గల్లంతైనవారు సురక్షితంగా ఉండాలని ఆకాంక్షించింది.

ఖతార్‌లో నివసిస్తున్న భారతీయుల భద్రతకు అత్యంత ప్రాధాన్యం ఇస్తున్నట్లు రాయబార కార్యాలయం స్పష్టం చేసింది. ఈ నేపథ్యంలో సహాయం, సమాచారం లేదా అత్యవసర అవసరాల కోసం ప్రత్యేక హెల్ప్‌లైన్ నంబర్లను అందుబాటులోకి తీసుకొచ్చింది.

భారతీయులు అవసరమైతే +974 55647502, +974 55384683 నంబర్లను సంప్రదించవచ్చని, అలాగే [email protected] ఈ-మెయిల్ ద్వారా కూడా రాయబార కార్యాలయాన్ని సంప్రదించవచ్చని అధికారులు తెలిపారు.

విదేశాల్లో ఇలాంటి అత్యవసర పరిస్థితులు తలెత్తినప్పుడు భారత రాయబార కార్యాలయాలు కీలక పాత్ర పోషిస్తాయని అధికారులు పేర్కొన్నారు. స్థానిక ప్రభుత్వ యంత్రాంగంతో సమన్వయం, బాధిత కుటుంబాలకు సహాయం, అధికారిక సమాచారాన్ని అందించడం వంటి చర్యల ద్వారా భారతీయులకు అండగా నిలుస్తాయని వెల్లడించారు.

అదేవిధంగా, ఖతార్‌లో నివసిస్తున్న భారతీయులు అధికారిక సమాచారం మాత్రమే నమ్మాలని, ధృవీకరించని వార్తలను సోషల్ మీడియాలో పంచుకోవద్దని సూచించారు. అత్యవసర పరిస్థితుల్లో అధికారుల సూచనలను పాటించడం, హెల్ప్‌లైన్ వివరాలను అందుబాటులో ఉంచుకోవడం అవసరమని రాయబార కార్యాలయం తెలిపింది.

ప్రస్తుతం పరిస్థితిని భారత రాయబార కార్యాలయం నిరంతరం పర్యవేక్షిస్తోందని, అవసరమైన సహాయ చర్యలను కొనసాగిస్తోందని అధికారులు వెల్లడించారు.

--రాజ్ కుమార్ వనంబత్తిన(మాగల్ఫ్ ప్రతినిధి,ఖతార్)