యూఏఈ: దుబాయ్ బ్రాండ్ విలువ దాదాపు 1 ట్రిలియన్ దిర్హమ్‌లను దాటింది. ఈ మేరకు బ్రాండ్ ఫైనాన్స్ ఒక కొత్త అధ్యయనం వెల్లడించింది. ఈ నివేదిక దుబాయ్‌ను ప్రపంచంలో ఐదవ అత్యంత శక్తివంతమైన నగర బ్రాండ్‌గా పేర్కొంది. గతంలో ఇది ఏడవ స్థానంలో ఉండేది. దుబాయ్ సాధించిన ఈ ఘనత  పెట్టుబడిదారుల ఆకర్షణ మరియు భవిష్యత్ వృద్ధి సామర్థ్యంపై బలమైన అభిప్రాయాలను ప్రతిబింబిస్తుందన్నారు.

అధ్యయనం ప్రకారం, ఎమిరేట్ మొత్తం బ్రాండ్ విలువలో డిజిటల్ దుబాయ్ వాటా సుమారు Dh31 బిలియన్లు. అంటే దాదాపు $8.5 బిలియన్లు. కాగా, ఇది దుబాయ్ మొత్తం సిటీ బ్రాండ్ స్ట్రెంత్ ఇండెక్స్ స్కోరుకు 1.9 పాయింట్లను జోడించింది. ఈ సహకారం దుబాయ్‌ను ప్రపంచంలోని మొదటి ఐదు స్థానాల్లోకి చేర్చడంలో సహాయపడింది.

ఈ ఇండెక్స్‌లో దుబాయ్ 100కి 86 స్కోరు సాధించింది. ఇది ప్రపంచవ్యాప్తంగా నగర బ్రాండ్‌లను అంచనా వేయడానికి బ్రాండ్ ఫైనాన్స్ ఉపయోగించే కొలమానాలలో బలమైన పనితీరును ప్రతిబింబిస్తుంది. డిజిటల్ దుబాయ్ AA+ రేటింగ్‌ను పొందింది. దీనితో ఇది ప్రపంచంలోని అగ్రగామి డిజిటల్ ప్రభుత్వ సంస్థల సరసన నిలవడమే కాకుండా, ప్రపంచ స్థాయిలో దుబాయ్ ప్రతిష్టను పెంచడంలో తన పాత్రను మరింత బలోపేతం చేసుకుందని అధ్యయనం పేర్కొంది.

దుబాయ్ డిజిటల్ ఎకోసిస్టమ్‌పై బలమైన నమ్మకం, విశ్వాసం ఉన్నట్లు కూడా ఈ అధ్యయనంలో వెల్లడించింది. నివాసితులు మరియు వ్యాపార సంస్థల మధ్య నమ్మకం మరియు ప్రతిష్ట రెండింటిలోనూ డిజిటల్ దుబాయ్ 10కి 8.4 స్కోరు సాధించింది.

డిజిటల్ దుబాయ్ డైరెక్టర్ జనరల్ హమద్ ఒబైద్ అల్ మన్సూరి మాట్లాడుతూ..  దుబాయ్ పోటీతత్వాన్ని బలోపేతం చేయడంలో డిజిటల్ ట్రాన్స్ ఫర్ మేషన్ పోషిస్తున్న కీలక పాత్రను ఈ ఫలితాలు ప్రతిబింబిస్తున్నాయని అన్నారు. డిజిటల్ ఎకోసిస్టమ్ ప్రాథమిక మౌలిక సదుపాయాల స్థాయిని దాటి, దుబాయ్‌లో నివసించడం, పనిచేయడం మరియు పెట్టుబడి పెట్టడం వంటి అనుభవంలో ఒక అంతర్భాగంగా అభివృద్ధి చెందిందని, అలాగే విశ్వాసానికి మరియు ప్రపంచవ్యాప్త ఆకర్షణకు కీలకంగా మారిందని ఆయన అన్నారు.