భాగ్యనగర వాసులకు పర్యావరణహితమైన, సౌకర్యవంతమైన ప్రయాణాన్ని అందించే దిశగా టీజీఆర్టీసీ తెలంగాణ గ్రేటర్ ఆర్టీసీ) మరో కీలక అడుగు వేసింది. కాలుష్య రహిత నగరమే లక్ష్యంగా గ్రేటర్ హైదరాబాద్ పరిధిలోకి కొత్తగా మరో 37 అత్యాధునిక ఎలక్ట్రిక్ బస్సులు (E-Buses) వచ్చి చేరాయి. ఇటీవల కూకట్‌పల్లి డిపో పరిధిలో ప్రారంభించిన 23 ఈ-బస్సులకు ప్రయాణికుల నుంచి అద్భుతమైన ఆదరణ లభించడంతో, ఈ గ్రీన్ నెట్‌వర్క్‌ను నగరం నలువైపులా విస్తరించాలని అధికారులు నిర్ణయించారు. అయితే, కొత్త బస్సులు డిపోలకు చేరుకున్నప్పటికీ.. అవి ప్రయాణికులకు అందుబాటులోకి రావడానికి మరికొంత సమయం పట్టేలా కనిపిస్తోంది. బస్సులను నడపడానికి అవసరమైన అర్హత కలిగిన డ్రైవర్ల కొరత (Drivers Scarcity) ఉండటమే ఈ జాప్యానికి ప్రధాన కారణం. ప్రయాణికుల భద్రత దృష్ట్యా డ్రైవర్ల ఎంపికలో కఠినమైన మెడికల్ టెస్టులు, డ్రైవింగ్ సామర్థ్య పరీక్షలు, ప్రత్యేక ట్రయల్ రన్ పూర్తి చేసిన తర్వాతే ఈ వాహనాలను రోడ్డెక్కించనున్నారు.

కొత్తగా పరుగులు పెట్టే 5 ప్రధాన రూట్లు ఇవే

నగరంలో అత్యధిక ప్రయాణికుల రద్దీ ఉండే 5 కీలక మార్గాలను ఎంపిక చేసి, ఈ కొత్త 37 ఎలక్ట్రిక్ బస్సులను కేటాయించేందుకు ఆర్టీసీ అధికారులు రూట్ మ్యాప్ సిద్ధం చేశారు:

• రూట్ 1 (19S/505): సనత్‌నగర్‌ నుంచి శంకర్‌పల్లి బస్ స్టేషన్‌
• రూట్ 2 (19M/P): మెహిదీపట్నం నుంచి ప్రగతినగర్‌
• రూట్ 3 (10 K/J): జగద్గిరిగుట్ట నుంచి సికింద్రాబాద్‌
• రూట్ 4 (10KM): సికింద్రాబాద్‌ నుంచి మియాపూర్‌ క్రాస్‌రోడ్‌
• రూట్ 5 (219): పటాన్‌చెరు బస్టాండ్‌ నుంచి సికింద్రాబాద్‌ రైల్వేస్టేషన్‌

ఇప్పటికే అందుబాటులో ఉన్న ఈ-బస్సుల వివరాలు

పాతబస్తీ వాసులతో పాటు ఐటీ కారిడార్, ప్రధాన కనెక్టివిటీ రూట్లలో ఆర్టీసీ ఇప్పటికే పలు మార్గాల్లో ఈ-బస్సులను విజయవంతంగా నడుపుతోంది.

స్తుతం నడుస్తున్న ప్రముఖ మార్గాలు

• బోరబండ ⇄ చార్మినార్
• బోరబండ ⇄ చార్మినార్‌ (వయా యూసుఫ్‌గూడ)
• సికింద్రాబాద్‌ ⇄ పర్వత్‌నగర్
• మెహిదీపట్నం ⇄ బోరబండ
• మెహిదీపట్నం ⇄ బోరబండ (వయా యూసుఫ్‌గూడ)

కొత్తగా రానున్న 37 బస్సులు కూడా తోడైతే నగరంలో కార్బన్ ఉద్గారాలు తగ్గి, కాలుష్య నివారణకు మరింత తోడ్పాటు లభిస్తుందని గ్రేటర్ ఆర్టీసీ అధికారులు ఆశాభావం వ్యక్తం చేస్తున్నారు.