కువైట్: ప్రాంతీయ భౌగోళిక-రాజకీయ ఉద్రిక్తతల మధ్య కూడా కువైట్ వినియోగదారులు భారీగా ఖర్చు పెడుతున్నారు. అమెరికా-ఇజ్రాయెల్-ఇరాన్ యుద్ధం ముగిసిన తర్వాత ఈ ఖర్చుల వేగంగా పుంజుకుని, మే 2026 నాటికి 4.76 బిలియన్ కువైట్ దినార్ల (KD) స్థాయికి చేరుకుంది. ఫిబ్రవరి-మే కాలంలో నమోదైన అత్యధిక స్థాయి ఇదే అని అధికారులు తెలిపారు.
కువైట్ సెంట్రల్ బ్యాంక్ గణాంకాల ప్రకారం..ఫిబ్రవరిలో 4.48 బిలియన్ KDగా ఉన్న వ్యయం మార్చిలో 4.6 బిలియన్ KDకి పెరిగింది. అయితే ప్రాంతీయ పరిణామాల నేపథ్యంలో నెలకొన్న అనిశ్చితి కారణంగా ఏప్రిల్‌లో 4.37 బిలియన్ KDకి తగ్గింది. అయినప్పటికీ, మే నెలలో వ్యయం 398.6 మిలియన్ KD మేర భారీగా పెరిగింది. ఇది వినియోగదారుల విశ్వాసం తిరిగి పుంజుకోవడాన్ని మరియు ఆర్థిక కార్యకలాపాలు వేగంగా సాధారణ స్థితికి రావడాన్ని సూచిస్తుందన్నారు.

పాయింట్-ఆఫ్-సేల్ (POS) లావాదేవీలు, ఆన్‌లైన్ చెల్లింపులు, ఏటీఎంలు మరియు తక్షణ చెల్లింపు సేవ అయిన 'WAMD' ద్వారా జరిగిన బలమైన కార్యకలాపాల ఫలితంగా..2026 మొదటి ఐదు నెలల్లో మొత్తం వినియోగదారుల వ్యయం సుమారు 23.17 బిలియన్ KDకి చేరుకుంది. అదే సమయంలో బ్యాంకింగ్ కార్యకలాపాలలో కూడా వృద్ధి కనిపించింది. మే చివరి నాటికి మొత్తం రుణ సదుపాయాలు 1.16 బిలియన్ KD పెరిగి 64.9 బిలియన్ KDకి చేరగా, మొత్తం డిపాజిట్లు 4.6% పెరిగి 61.89 బిలియన్ KDకి చేరుకున్నాయి. ఇది కువైట్ ఆర్థిక వ్యవస్థ మరియు ఆర్థిక రంగంపై ఉన్న నిరంతర విశ్వాసాన్ని ప్రతిబింబిస్తుందని ఆర్థిక రంగ నిపుణులు తెలిపారు.