సిడ్నీ: 16 ఏళ్లలోపు పిల్లల సోషల్ మీడియా వాడకంపై ఆస్ట్రేలియా విధించిన విప్లవాత్మక నిషేధం, తొలి కొన్ని నెలల్లో పెద్దగా ప్రభావం చూపలేదు. ఆంక్షలు ఉన్నప్పటికీ, ప్రతి ఐదుగురు టీనేజర్లలో నలుగురి కంటే ఎక్కువ మంది ప్రముఖ ప్లాట్‌ఫారమ్‌లను ఉపయోగించడం కొనసాగిస్తున్నారని ఒక కొత్త అధ్యయనం వెల్లడించింది.

న్యూకాజిల్ విశ్వవిద్యాలయంలోని పరిశోధకులు పలు ఉల్లంఘనలను గుర్తించారు. చాలా మంది మైనర్ వినియోగదారులు ఫేక్ అకౌంట్లను క్రియేట్ చేయడం లేదా తప్పుడు వయస్సు ధృవీకరణ యంత్రాంగాలను ఉపయోగించడం ద్వారా ఈ నిషేధాన్ని తప్పించుకుంటున్నారు. చాలా నెట్‌వర్క్‌లు సెల్ఫ్ వయస్సు ధృవీకరణ లేదా జనరల్ సెల్ఫీ ధృవీకరణపై ఆధారపడ్డాయి.  ఇది చాలా మంది యంగ్ యూజర్స్ ఆన్‌లైన్‌లో కొనసాగడానికి వీలు కల్పించింది.

పరిశోధకుల ప్రకారం, పటిష్టమైన అమలు మరియు విశ్వసనీయమైన వయస్సు ధృవీకరణ లేనప్పుడు, ఈ ఫలితాలు విస్తృత నిషేధాల సామర్థ్యంపై సందేహాలను రేకెత్తిస్తున్నాయి. కేవలం వయస్సు పరిమితులపై మాత్రమే ఆధారపడకుండా, ఆన్‌లైన్‌లో పిల్లలను సురక్షితంగా ఉంచడానికి మెరుగైన ప్లాట్‌ఫారమ్ డిజైన్, డిజిటల్ లిటరసీ మరియు మరింత సమగ్రమైన పిల్లల-భద్రతా చర్యలు కూడా అవసరమని వారు నివేదించారు.

డిసెంబర్ 2025లో, 16 ఏళ్లలోపు వారు సోషల్ మీడియాను ఉపయోగించడాన్ని నిషేధించిన మొదటి దేశంగా ఆస్ట్రేలియా నిలిచింది. ఇలాంటి చట్టాల గురించి ఆలోచిస్తున్న యూకేతో సహా పలు ప్రభుత్వాలు, తాజా పరిశోధనల ఫలితాలను స్టడీ చేస్తున్నారు.