అబుదాబి: భారత్–యూఏఈ మధ్య వాణిజ్య, పెట్టుబడుల భాగస్వామ్యాన్ని మరింత బలోపేతం చేసే దిశగా 14వ భారత్–యూఏఈ హై-లెవల్ జాయింట్ టాస్క్ ఫోర్స్ ఆన్ ఇన్వెస్ట్‌మెంట్స్ సమావేశం జరిగింది. ఈ సమావేశానికి భారత్ తరఫున, యూఏఈ అబుదాబి ఇన్వెస్ట్‌మెంట్ అథారిటీ (ADIA) మేనేజింగ్ డైరెక్టర్ హెచ్‌.హెచ్‌. షేక్ హామెద్ బిన్ జాయెద్ అల్ నహ్యాన్‌తో కలిసి సహాధ్యక్షత వహించారు. యూఏఈ విదేశీ వాణిజ్య శాఖ మంత్రి హెచ్‌.ఈ. డా. థాని బిన్ అల్ జెయౌదీ కూడా సమావేశానికి హాజరయ్యారు.

సమావేశంలో భారత్–యూఏఈ మధ్య ఇప్పటికే బలంగా ఉన్న వాణిజ్య, పెట్టుబడుల సంబంధాలను మరింత విస్తరించడంపై విస్తృతంగా చర్చించారు. ముఖ్యంగా ఇంధనం, మౌలిక వసతులు, లాజిస్టిక్స్, అధునాతన సాంకేతికత, ఆహార భద్రతతో పాటు ఇతర ప్రాధాన్య రంగాల్లో సహకారాన్ని ముందుకు తీసుకెళ్లడంపై దృష్టి సారించారు.

ఇప్పటికే కొనసాగుతున్న పెట్టుబడి సంబంధిత కార్యక్రమాల పురోగతిని సమీక్షించడంతో పాటు, ఇరు దేశాల పెట్టుబడిదారులకు మరిన్ని అవకాశాలు కల్పించడం, పెట్టుబడులను సులభతరం చేయడానికి తీసుకోవాల్సిన చర్యలపై కూడా చర్చించారు.

అలాగే, భారత్–యూఏఈ సమగ్ర ఆర్థిక భాగస్వామ్య ఒప్పందం (CEPA) వాణిజ్య అడ్డంకులను తగ్గించడంలో, కొత్త రంగాల్లో వృద్ధికి మార్గం సుగమం చేయడంలో పోషిస్తున్న పాత్రను సమావేశంలో సమీక్షించారు.

భారత్–యూఏఈ సంబంధాలకు అత్యంత ప్రాధాన్యత ఉందని, ఇరు దేశాల మధ్య ఆర్థిక భాగస్వామ్యంలో కొత్త అవకాశాలను అందిపుచ్చుకుంటూ, పెట్టుబడులు మరియు వాణిజ్య సహకారాన్ని మరింత ఉన్నత స్థాయికి తీసుకెళ్లేందుకు కట్టుబడి ఉన్నట్లు సమావేశంలో స్పష్టం చేశారు.