దుబాయ్: ప్రధాన రహదారుల్లో వాహనదారులను లక్ష్యంగా చేసుకుని భిక్షాటన చేస్తున్నారన్న ఆరోపణలపై 22 మందితో కూడిన ముఠాను దుబాయ్ పోలీసులు అరెస్ట్ చేశారు. దుబాయ్ పోలీసుల  పోలీస్ ఐ సర్వీస్ ద్వారా అందిన ఫిర్యాదు ఆధారంగా ఈ ముఠా కార్యకలాపాలను పోలీసులు గుర్తించారు. నిందితులు నగరంలోని రద్దీగా ఉండే ప్రధాన రహదారులపై వాహనదారులను సంప్రదించి, ప్రయాణ ఖర్చులకు డబ్బులు అవసరమని చెప్పి సానుభూతి పొందేందుకు ప్రయత్నించినట్లు పోలీసులు తెలిపారు. ఫిర్యాదు అందిన అనంతరం పోలీసులు ముఠా కదలికలపై నిఘా పెట్టి, మొత్తం 22 మంది సభ్యులను అదుపులోకి తీసుకున్నారు.

2026 మార్చిలో కూడా దుబాయ్ పోలీసులు మరో 13 మంది సభ్యులతో కూడిన ముఠాను అరెస్ట్ చేశారు. ఆ ముఠాకు విదేశాల నుంచి నాయకత్వం వహిస్తున్నట్లు ఆరోపణలు వచ్చాయి. యూఏఈలో చిక్కుకుపోయామని, తమకు డబ్బు అవసరమని వంటి కల్పిత కథలు చెప్పి ప్రజల నుంచి డబ్బులు అడిగినట్లు అప్పట్లో పోలీసులు తెలిపారు.
దుబాయ్ పోలీసుల గణాంకాల ప్రకారం 2021 నుంచి 2025 వరకు మొత్తం 1,801 భిక్షాటన కేసులు నమోదయ్యాయి. యూఏఈ క్రైమ్స్ అండ్ పెనాల్టీస్ చట్టం ప్రకారం భిక్షాటనకు పాల్పడినట్లు రుజువైతే మూడు నెలల వరకు జైలు శిక్ష, Dh5,000 వరకు జరిమానా విధించే అవకాశం ఉంది.

అలాగే, ప్రొఫెషనల్ భిక్షాటన ముఠాను నిర్వహించడం లేదా విదేశాల నుంచి వ్యక్తులను భిక్షాటన కోసం నియమించుకోవడం వంటి నేరాలకు మరింత కఠినమైన శిక్షలు ఉన్నాయి. ఇలాంటి కేసుల్లో కనీసం ఆరు నెలల జైలు శిక్ష, కనీసం Dh100,000 జరిమానా విధించే అవకాశం ఉంది.

భిక్షాటనకు సంబంధించిన అనుమానాస్పద కార్యకలాపాలను ప్రజలు  దుబాయ్ పోలీస్ యాప్‌లోని పోలీస్ ఐ సర్వీస్, 901 నంబర్ లేదా  e-క్రైమ్ ప్లాట్‌ఫామ్ ద్వారా నివేదించవచ్చని పోలీసులు తెలిపారు.  అవసరమైన వారికి సహాయం చేయాలనుకునే వారు వీధుల్లో నేరుగా డబ్బులు ఇవ్వకుండా అధికారికంగా గుర్తింపు పొందిన స్వచ్ఛంద సంస్థల ద్వారా మాత్రమే విరాళాలు ఇవ్వాలని దుబాయ్ పోలీసులు సూచించారు.