విశాఖలో ప్రాణాంతక వ్యాధితో పోరాడుతున్న ఐదేళ్ల చిన్నారి కుందన పూర్ణ చంద్రికను సినీనటుడు రామ్‌ పరామర్శించారు. ఎంవీపీ కాలనీ సెక్టార్‌-3లోని కుందన ఇంటికి వచ్చి చిన్నారితో కాసేపు గడిపారు. కుందన త్వరగా కోలుకొని, సంతోషంగా తిరగాలని దేవుడ్ని ప్రార్థిస్తున్నట్లు చెప్పారు. రామ్‌ అంటే కుందనకు ఎంతో అభిమానమని.. రామ్‌ను చూడాలన్న ఆమె కోరిక నెరవేరడంతో ఎంతో సంతోషంగా ఉందని కుందన తల్లిదండ్రులు తెలిపారు.
కుందన పుట్టినప్పట్నుంచి నడుము కింది భాగం పూర్తిగా చచ్చుబడిపోయింది. కాళ్లు కదపలేని పరిస్థితులో ఉన్న ఆమెను తల్లిదండ్రులు జాగ్రత్తగా కాపాడుకుంటూ వస్తున్నారు. 'ఈనాడు'లో ప్రచురితమైన కథనంతోనే తన అభిమాని పూర్ణ చంద్రిక కోరిక తెలుసుకోగల్గానని ఈ సందర్భంగా రామ్‌ అన్నారు.
సుమారు 15 నిమిషాల పాటు చిన్నారితో గడిపిన రామ్‌ శనివారం భోజనానికి రావాలని కుందన కుటుంబ సభ్యులను ఆహ్వానించారు. ఆయన వెంట బీజేవైఎం రాష్ట్ర ప్రతినిధి దామోదర యాదవ్‌, హైపర్‌ చిత్ర యూనిట్‌ సభ్యులు ఉన్నారు.