దుబాయ్: యునైటెడ్ అరబ్ ఎమిరేట్స్ (యూఏఈ)లో పర్యాటకులు, తరచూ దేశాన్ని సందర్శించే ప్రయాణికులకు మరింత సౌలభ్యం కల్పించేలా 5 సంవత్సరాల మల్టిపుల్ ఎంట్రీ టూరిస్ట్ వీసా నిబంధనలను దుబాయ్ జనరల్ డైరెక్టరేట్ ఆఫ్ ఐడెంటిటీ అండ్ ఫారినర్స్ అఫైర్స్ (GDRFA) మరోసారి స్పష్టం చేసింది.

ఈ వీసాతో ప్రపంచంలోని అన్ని దేశాల పౌరులు స్పాన్సర్ లేదా హోస్ట్ అవసరం లేకుండా స్వయంగా దరఖాస్తు చేసుకుని ఐదేళ్ల పాటు యూఏఈలో పలుమార్లు ప్రవేశించి, బయటకు వెళ్లే అవకాశం ఉంటుంది.

ఒక్కోసారి 90 రోజులు.. ఏడాదికి గరిష్టంగా 180 రోజులు

ఈ వీసా కలిగిన వారు ప్రతి సందర్శనలో 90 రోజుల వరకు యూఏఈలో ఉండవచ్చు. అవసరమైతే మరో 90 రోజుల పాటు పొడిగించుకునే అవకాశం కూడా ఉంది. అయితే, ఒక క్యాలెండర్ సంవత్సరంలో మొత్తం 180 రోజులకు మించి యూఏఈలో ఉండేందుకు అనుమతి ఉండదు.

ఈ వీసా ప్రధానంగా పర్యాటకులు, తరచూ యూఏఈకి వచ్చే వ్యాపారవేత్తలు, కుటుంబ సభ్యులను సందర్శించే వారు, తరచూ ప్రయాణించే అంతర్జాతీయ సందర్శకులను దృష్టిలో ఉంచుకుని రూపొందించబడింది.

అర్హతకు అవసరమైన పత్రాలు

ఈ వీసా కోసం దరఖాస్తు చేసుకునే వారు కింది పత్రాలను సమర్పించాల్సి ఉంటుంది:

• కనీసం ఆరు నెలల గడువు ఉన్న పాస్‌పోర్ట్
• తాజా పాస్‌పోర్ట్ సైజ్ ఫొటో
• చెల్లుబాటు అయ్యే హెల్త్ ఇన్సూరెన్స్
• రౌండ్ ట్రిప్ విమాన టికెట్
• గత ఆరు నెలల బ్యాంక్ స్టేట్‌మెంట్
• గత ఆరు నెలల కాలంలో కనీసం 4,000 అమెరికన్ డాలర్లు (లేదా సమాన విలువైన ఇతర కరెన్సీ) బ్యాంక్ బ్యాలెన్స్ ఉన్నట్లు ఆధారాలు

ఎలా దరఖాస్తు చేసుకోవాలి?

దరఖాస్తులను యూఏఈ అధికారిక డిజిటల్ ప్లాట్‌ఫారమ్‌లు, స్మార్ట్ యాప్‌ల ద్వారా 24 గంటల పాటు ఆన్‌లైన్‌లో సమర్పించవచ్చు. అలాగే కస్టమర్ హ్యాపీనెస్ సెంటర్లు మరియు అమెర్ సర్వీస్ సెంటర్ల ద్వారా కూడా దరఖాస్తు చేసుకునే సౌకర్యం ఉంది.

దరఖాస్తు ప్రక్రియలో సేవను ఎంపిక చేయడం, దరఖాస్తు ఫారమ్ నింపడం, అవసరమైన పత్రాలు అప్‌లోడ్ చేయడం, అనంతరం ఫీజు చెల్లించడం వంటి దశలు ఉంటాయి.

వీసా ఫీజు ఎంత?

ఈ 5 ఏళ్ల మల్టిపుల్ ఎంట్రీ టూరిస్ట్ వీసా కోసం మొత్తం Dh3,713 వరకు ఖర్చు అవుతుంది. ఇందులో వీసా ఫీజు, సేవా ఛార్జీలు, తిరిగి చెల్లించే సెక్యూరిటీ డిపాజిట్ కూడా ఉంటాయి. అయితే వ్యక్తిగత పరిస్థితులు, అదనపు అవసరాల ఆధారంగా ఫీజులో స్వల్ప మార్పులు ఉండొచ్చు.

వీసాదారులకు సూచనలు

వీసా గడువును, యూఏఈలో గడిపిన రోజుల సంఖ్యను తప్పనిసరిగా పరిశీలించుకోవాలని GDRFA సూచించింది. ఎంట్రీ, ఎగ్జిట్ వివరాలను ట్రావెల్ మూవ్‌మెంట్ రిపోర్ట్ ద్వారా తనిఖీ చేసుకోవడం ద్వారా ఓవర్‌స్టే జరిమానాలను నివారించవచ్చని తెలిపింది.

యూఏఈ పర్యాటక రంగానికి మరింత ఊతం

ఈ 5 ఏళ్ల మల్టిపుల్ ఎంట్రీ టూరిస్ట్ వీసా ద్వారా యూఏఈని ప్రపంచస్థాయి పర్యాటక గమ్యస్థానంగా మరింత బలోపేతం చేయడంతో పాటు, విదేశీ సందర్శకుల సంఖ్య పెరగడం, పర్యాటక రంగం, హోటల్ పరిశ్రమ, వ్యాపార రంగాలకు దీర్ఘకాలికంగా ప్రయోజనం చేకూరుతుందని అధికారులు భావిస్తున్నారు.