విలక్షణ కథానాయకుడు కమల్‌హాసన్ ఇటీవల జరిగిన ప్రమాదానంతరం తిరిగి కోలుకున్నారు. ఆల్వార్‌పేటలోని తన కార్యాలయం మెట్లు ఎక్కుతూ జారిపడటంతో ఈమధ్యనే ఆయన కుడి కాలికి సర్జరీ జరిగింది. గత వారంలోనే ఆసుపత్రి నుంచి డిశ్చార్చ్ అయ్యారు. రెండ్రోజులుగా ఆయన జిమ్‌కు వెళ్తున్నారు. ఇదే విషయాన్ని తన అభిమానులతో ఆయన ట్విటర్‌లో పంచుకున్నారు. 'కుట్లు విప్పారు. గత రెండు రోజులుగా జిమ్‌కు వెళ్తున్నా. పూర్తి స్థాయిలో ఫిజియో జరుగుతోంది. నా ఆరోగ్య పరిస్థితి మెరుగుపడాలని కోరుకున్న నా శ్రేయోభిలాషులందరికీ ధన్యవాదాలు' అని ఆ ట్వీట్‌లో కమల్ పేర్కొన్నారు. అంతకుముందు, వాట్సాప్ ఆడియోలో తమిళంలో ఆయన మాట్లాడుతూ, తన పట్ల ఇంతగా ప్రేమాభిమానులు చూపిస్తున్న అభిమానులు, మిత్రులు, కుటుంబసభ్యులు, మీడియా మిత్రులందరికీ కృతజ్ఞతలని అన్నారు. చేయాల్సిన పనులు చాలా ఉన్నాయని, ఈ సమయంలో ప్రమాదం జరగడం దురదృష్టమేనని ఆయన వృత్తి పట్ల తనకున్న నిబద్ధతను మరోసారి చాటుకున్నారు. ప్రస్తుతం కమల్ 'శభాష్ నాయుడు' చిత్రంలో నటిస్తున్నారు.