హైదరాబాద్: భారతదేశంలో సుస్థిరత, వాతావరణ ఆవిష్కరణలు, సామాజిక బాధ్యత (CSR) మరియు సామాజిక వ్యవస్థాపకతను ప్రోత్సహించే ప్రతిష్టాత్మక ‘ఆండ్ పర్పస్ ఫోరమ్’ నాల్గవ ఎడిషన్ సదస్సు హైదరాబాద్‌లోని స్టార్టప్ హబ్ ‘టి-హబ్’ (T-Hub) వేదికగా అత్యంత విజయవంతంగా ముగిసింది. ప్రభుత్వం, పారిశ్రామిక రంగాలు, స్టార్టప్‌లు, విద్యాసంస్థలు మరియు దాతృత్వ రంగాలకు చెందిన సుమారు 200 మందికి పైగా ప్రముఖులను ఈ ఫోరమ్ ఒకే తాటిపైకి తీసుకువచ్చింది. దేశ సమ్మిళిత భవిష్యత్తును రూపుదిద్దే వ్యూహాలపై ఇక్కడ లోతైన చర్చలు జరిగాయి. ఈ సందర్భంగా ఆండ్ పర్పస్ వ్యవస్థాపకురాలు కామ్నా హజ్రతి మాట్లాడుతూ, సుస్థిరత ప్రయాణంలో తెలంగాణ దేశంలోనే ప్రముఖ ఆవిష్కరణల కేంద్రంగా నిలిచిందని కొనియాడారు. కేవలం సంభాషణలకే పరిమితం కాకుండా, ఆలోచనలను ఆచరణాత్మక భాగస్వామ్యాలుగా మార్చడమే ఈ ఫోరమ్ యొక్క ప్రధాన ఉద్దేశమని ఆమె స్పష్టం చేశారు.

రూ.34 లక్షల కోట్ల సర్క్యులర్ ఎకానమీ అవకాశం

ఈ సదస్సులో పాల్గొన్న ‘RE సస్టైనబిలిటీ’ మేనేజింగ్ డైరెక్టర్ & గ్రూప్ సీఈఓ మసూద్ మాలిక్ భారతదేశ ఆర్థిక, పర్యావరణ భవిష్యత్తుపై కీలకమైన విశ్లేషణ చేశారు. దేశంలో సర్క్యులర్ ఎకానమీ అనేది ఇకపై కేవలం పర్యావరణ బాధ్యత మాత్రమే కాదని, అది 2030 నాటికి 300 నుండి 400 బిలియన్ డాలర్ల (సుమారు Rs.25 లక్షల కోట్ల నుండి Rs.34 లక్షల కోట్ల) భారీ ఆర్థిక అవకాశంగా మారబోతోందని ఆయన నొక్కిచెప్పారు. ఇంతటి భారీ మార్పును సాధించాలంటే మౌలిక సదుపాయాలు, సాంకేతికత వంటి ‘హార్డ్’ అంశాలు, పరిశోధన, వ్యూహాత్మక మూలధనం వంటి ‘సాఫ్ట్’ అంశాలతో అనుసంధానం కావాలని ఆయన సూచించారు. వాతావరణ చర్యలు, పునరుత్పాదక వ్యవసాయం, సుస్థిర రవాణా మరియు సామాజిక ప్రభావం కోసం ఆర్టిఫిషియల్ ఇంటెలిజెన్స్ (AI) వినియోగం వంటి వినూత్న అంశాలపై జరిగిన ప్యానెల్ చర్చలు, స్టార్టప్ ప్రదర్శనలు ఈ సదస్సులో ప్రత్యేక ఆకర్షణగా నిలిచాయి.