కువైట్ సిటీ: ఇరాన్ కొనసాగిస్తున్న దాడుల నేపథ్యంలో కువైట్‌ను లక్ష్యంగా చేసుకుని ప్రయోగించిన క్షిపణులు, డ్రోన్లను దేశ గగనతల రక్షణ వ్యవస్థలు విజయవంతంగా అడ్డుకుంటున్నట్లు కువైట్ సైన్యం జనరల్ స్టాఫ్ సోమవారం ప్రకటించింది.

కువైట్ అధికారిక వార్తా సంస్థ కునా (KUNA) ప్రచురించిన ప్రకటనలో, ప్రస్తుతం కువైట్ వైపు దూసుకొస్తున్న శత్రు క్షిపణులు, డ్రోన్లను ఎయిర్ డిఫెన్స్ వ్యవస్థలు నిరంతరం గుర్తించి ధ్వంసం చేస్తున్నట్లు పేర్కొంది.

ప్రజలకు వినిపిస్తున్న పేలుళ్ల శబ్దాలు శత్రు వైమానిక ముప్పును గగనతల రక్షణ వ్యవస్థలు అడ్డుకుని నిర్వీర్యం చేస్తున్న సమయంలో ఏర్పడుతున్నవేనని సైన్యం స్పష్టం చేసింది.

ప్రజలు ఎలాంటి ఆందోళనకు గురికాకుండా, సంబంధిత అధికార యంత్రాంగం జారీ చేస్తున్న భద్రతా సూచనలను తప్పనిసరిగా పాటించాలని కువైట్ సైన్యం విజ్ఞప్తి చేసింది. దేశ భద్రతను పరిరక్షించేందుకు అన్ని రక్షణ వ్యవస్థలు అప్రమత్తంగా పనిచేస్తున్నాయని, పరిస్థితిని నిరంతరం పర్యవేక్షిస్తున్నట్లు వెల్లడించింది.