జెడ్డా: సౌదీ అరేబియాలోని జెడ్డా మున్సిపాలిటీ అధికారులు నిర్వహించిన ప్రత్యేక తనిఖీల్లో ప్రముఖ క్రీడా క్లబ్‌ల లోగోలు, వాణిజ్య ట్రేడ్‌మార్క్‌లను నకిలీగా ముద్రించిన 3,699 బ్రాండెడ్ దుస్తులను స్వాధీనం చేసుకుని ధ్వంసం చేశారు.  దక్షిణ, మధ్య జెడ్డా ప్రాంతాల్లో నిర్వహించిన రెండు ప్రత్యేక తనిఖీల్లో ఈ అక్రమ కార్యకలాపాలు వెలుగుచూశాయని జెడ్డా మున్సిపాలిటీ మానిటరింగ్ అండ్ అడ్రెస్సింగ్ నెగటివ్ ఫినామెనా డైరెక్టర్ జనరల్ యాసర్ బఖ్ష్‌ తెలిపారు. నకిలీ దుస్తుల తయారీలో ఉపయోగించిన 19 కుట్టు, ఎంబ్రాయిడరీ, ప్రింటింగ్, కటింగ్ యంత్రాలను కూడా అధికారులు స్వాధీనం చేసుకున్నారు. నిందితులను తదుపరి చట్టపరమైన చర్యల కోసం సంబంధిత అధికారులకు అప్పగించారు.

 

అల్ జామియా మున్సిపాలిటీ పరిధిలోని ఓ నివాస భవనంలో రెండు గదులను అక్రమంగా నకిలీ బ్రాండెడ్ దుస్తుల తయారీ కేంద్రంగా మార్చినట్లు అధికారులు గుర్తించారు. అక్కడ కుట్టు, ఎంబ్రాయిడరీ, ప్రింటింగ్ పనులు జరుగుతుండగా 1,029 నకిలీ దుస్తులను స్వాధీనం చేసుకుని ధ్వంసం చేశారు. అలాగే అక్కడ లభించిన 850 బ్రాండ్ లేని కొత్త దుస్తులను సేవా కార్యక్రమాల కోసం ఎస్తిదామా ఫుడ్ ప్రిజర్వేషన్ అసోసియేషన్ కు విరాళంగా అందజేశారు.

 

అనంతరం నివాస, వాణిజ్య సముదాయంగా ఉపయోగిస్తున్న మరో భవనంలోని అపార్ట్‌మెంట్‌పై దాడి నిర్వహించిన అధికారులు అక్కడ నుంచి 2,670 నకిలీ బ్రాండెడ్ దుస్తులను స్వాధీనం చేసుకుని సంబంధిత శాఖల సమక్షంలో ధ్వంసం చేశారు. ఈ తనిఖీలు అల్ జామియా, అల్ అజీజియా మున్సిపాలిటీలు, జకాత్, పన్ను మరియు కస్టమ్స్ అథారిటీ, వాణిజ్య మంత్రిత్వ శాఖ, సివిల్ డిఫెన్స్, సౌదీ మేధో సంపత్తి అథారిటీతో పాటు అమలు బృందాల సమన్వయంతో నిర్వహించినట్లు అధికారులు తెలిపారు. నివాస ప్రాంతాల్లో అక్రమ వ్యాపారాలను అరికట్టడం, వినియోగదారుల ప్రయోజనాలను కాపాడడం, చట్టాల అమలును మరింత కట్టుదిట్టం చేయడం కోసం ఇటువంటి తనిఖీలను భవిష్యత్తులో కూడా కొనసాగిస్తామని జెడ్డా మున్సిపాలిటీ వెల్లడించింది.