అమరావతి: ఆంధ్రప్రదేశ్ రాష్ట్రంలో పోలీసు వ్యవస్థను ఆధునిక సాంకేతిక పరిజ్ఞానంతో మరింత పటిష్ఠం చేసే దిశగా కూటమి ప్రభుత్వం మరో కీలక అడుగు వేసింది. ఇందులో భాగంగా విజయవాడ కమిషనరేట్ పోలీసులు ప్రత్యేకంగా రూపొందించిన ‘ఏపీ అస్త్రం’ (AP Astram) మొబైల్ యాప్‌ను రాష్ట్ర ముఖ్యమంత్రి నారా చంద్రబాబు నాయుడు ఆవిష్కరించారు. విజయవాడలోని అంబేడ్కర్ కళా వేదికలో మూడు రోజుల పాటు అత్యంత ప్రతిష్ఠాత్మకంగా నిర్వహించిన ‘ఏపీ పోలీస్ రిట్రీట్-2026: ఫ్యూచర్ పోలీసింగ్’ కాన్ఫరెన్స్ ముగింపు సమావేశంలో ఆయన ముఖ్య అతిథిగా పాల్గొని దిశానిర్దేశం చేశారు.

మారుతున్న కాలానికి అనుగుణంగా నేరాల స్వరూపం, నేరస్థుల పద్ధతులు పూర్తిగా మారిపోయాయని, ఈ నూతన సవాళ్లను సమర్థవంతంగా ఎదుర్కొనేందుకు పోలీసింగ్‌లో ఆధునిక టెక్నాలజీ వినియోగం అత్యవసరమని ముఖ్యమంత్రి స్పష్టం చేశారు. కేవలం టెక్నాలజీని అందిపుచ్చుకోవడమే కాకుండా, పోలీసు వ్యవస్థ నిర్మాణాన్నే పునఃసమీక్షించాల్సిన అవసరం ఉందన్నారు.

ఏఐ, డిజిటల్ లిటరసీయే భవిష్యత్ పోలీసింగ్ – సీఎం ఆదేశాలు

భవిష్యత్ పోలీసింగ్‌ను ఆర్టిఫిషియల్ ఇంటెలిజెన్స్ (AI), మరియు డిజిటల్ లిటరసీ ఆధారంగా నిర్మించడమే ప్రధాన లక్ష్యంగా ముందుకు సాగాలని ఉన్నతాధికారులకు సీఎం సూచించారు. 2001లోనే తాను ఫ్యూచర్ పోలీసింగ్ వర్క్‌షాప్ నిర్వహించిన విషయాన్ని గుర్తుచేస్తూ, అప్పటితో పోలిస్తే నేడు సోషల్ మీడియా ద్వారా అసత్య ప్రచారాలు చేయడం, సమాజంలో విద్వేషాన్ని రెచ్చగొట్టే ప్రయత్నాలు తీవ్రంగా పెరిగాయన్నారు. వీటిని అడ్డుకునే సాంకేతిక సామర్థ్యాన్ని పోలీసులు పెంపొందించుకోవాలన్నారు.

పోలీసుల సేవలను మరింత సమర్థవంతంగా వినియోగించుకునేందుకు వారి నైపుణ్యాలను పెంచడంపై దృష్టి పెట్టాలని అధికారులను ఆదేశించారు. ముఖ్యంగా హెడ్ కానిస్టేబుళ్లు, ఏఎస్ఐల సీనియారిటీ, అనుభవాన్ని గుర్తించి వారికి ప్రత్యేక శిక్షణ ఇచ్చి కీలక బాధ్యతలు అప్పగించాలన్నారు. ఇందుకోసం సోషల్ మీడియా, సైబర్ నేరాలు, గంజాయి-డ్రగ్స్ నిర్మూలన, మహిళలపై నేరాల నియంత్రణ, మరియు కన్విక్షన్ రేటు పెంపు వంటి అంశాల్లో ప్రత్యేక సర్టిఫికేషన్ కోర్సులను ప్రవేశపెట్టాలని స్పష్టం చేశారు.

AP Astram App: ‘ధర్మ’ యాప్ ఆవిష్కరణ–రతన్ టాటా ఇన్నోవేషన్ హబ్‌తో ఎంఓయూ

ప్రతి పోలీసు సిబ్బందికి డిజిటల్ లిటరసీ తప్పనిసరి అని, ఉన్నతాధికారులు కూడా సాంకేతిక నిపుణులతో నిరంతరం సంప్రదింపులు జరుపుతూ కొత్త పరిజ్ఞానాన్ని అందిపుచ్చుకోవాలన్నారు. నేరం చేసిన వారికి వేగంగా శిక్షలు పడేలా దర్యాప్తు వ్యవస్థ పనిచేస్తేనే నేరస్థుల్లో భయం పుడుతుందని, శాంతిభద్రతల పరిరక్షణలో ముందస్తు ప్రణాళికలు, సమర్థవంతమైన దర్యాప్తు అత్యంత కీలకమని వ్యాఖ్యానించారు.

ఈ సదస్సు వేదికగా నూతన ఏపీ పోలీస్ వెబ్‌సైట్తో పాటు ‘ధర్మ’ (Dharma App) యాప్‌ను సీఎం ఆవిష్కరించారు. రోడ్ సేఫ్టీ, క్రౌడ్ మేనేజ్‌మెంట్ సహా 8 కీలక అంశాలపై ఏపీ పోలీసులు.. రతన్ టాటా ఇన్నోవేషన్ హబ్ మరియు విట్ (VIT) యూనివర్సిటీలతో ముఖ్యమంత్రి సమక్షంలో చారిత్రాత్మక అవగాహన ఒప్పందాలు (MoUs) కుదుర్చుకున్నారు. వీటితో పాటు ఫోరెన్సిక్ మరియు డాగ్ స్క్వాడ్ విభాగాలను మరింత బలోపేతం చేయాలని ఆదేశించారు.

ఈ ప్రతిష్టాత్మక ముగింపు కార్యక్రమంలో రాష్ట్ర హోం శాఖ మంత్రి వంగలపూడి అనిత, హోం కార్యదర్శి కుమార్ విశ్వజిత్, డీజీపీ హరీష్ కుమార్ గుప్తా, వివిధ విభాగాల ఐపీఎస్ అధికారులు, జిల్లాల ఎస్పీలు మరియు పోలీస్ అధికారులు పెద్ద సంఖ్యలో పాల్గొన్నారు.