రియాద్: ప్రాంతీయ పరిణామాలు, హోర్ముజ్ లో నౌకాయాన భద్రత, సభ్య దేశాల మధ్య సమన్వయాన్ని మరింత బలోపేతం చేసే అంశాలపై గల్ఫ్ కోఆపరేషన్ కౌన్సిల్ (GCC) విదేశాంగ మంత్రులు వర్చువల్ సమావేశంలో చర్చించారు. ఈ సమావేశంలో సౌదీ అరేబియా విదేశాంగ మంత్రి ప్రిన్స్ ఫైసల్ బిన్ ఫర్హాన్ పాల్గొన్నారు. ప్రాంతంలో నెలకొన్న తాజా పరిస్థితులు, కొనసాగుతున్న చర్చలు, ఉద్రిక్తతలను తగ్గించి ప్రాంతీయ శాంతి, భద్రతను బలోపేతం చేసే చర్యలపై మంత్రులు తమ అభిప్రాయాలను పంచుకున్నారు.

హోర్ముజ్ జలసంధిలో నౌకాయాన స్వేచ్ఛ, భద్రతను కాపాడడం, అంతర్జాతీయ చట్టాలకు అనుగుణంగా రవాణా హక్కులు, సరుకు రవాణా నిరంతరాయంగా కొనసాగేందుకు సభ్య దేశాల మధ్య సమన్వయాన్ని మరింత పెంచే మార్గాలపై కూడా సమావేశంలో చర్చించారు. అలాగే గల్ఫ్ తీర దేశాల సార్వభౌమ హక్కులను పరిరక్షించాల్సిన అవసరం ఉందని అభిప్రాయపడ్డారు.

ప్రాంతీయ సమస్యల పరిష్కారానికి రాజకీయ, దౌత్యపరమైన మార్గాలకే ప్రాధాన్యం ఇవ్వాలని, పరస్పర విశ్వాసాన్ని పెంపొందించే వాతావరణాన్ని సృష్టించి అన్ని పక్షాలకు ఆమోదయోగ్యమైన పరిష్కారాలను సాధించేందుకు సంయుక్తంగా కృషి కొనసాగించాలని ఈ సందర్భంగా జీసీసీ దేశాల విదేశాంగ మంత్రులు పిలుపునిచ్చారు.