రియాద్:సౌదీ అరేబియాలో భారీ డ్రగ్స్ స్మగ్లింగ్ యత్నాన్ని జకాత్, ట్యాక్స్ అండ్ కస్టమ్స్ అథారిటీ (ZATCA) అధికారులు భగ్నం చేశారు. అల్ హదీథా సరిహద్దు చెక్‌పోస్ట్ ద్వారా రాజ్యంలోకి ప్రవేశిస్తున్న ఓ బస్సులో అక్రమంగా తరలిస్తున్న 36,773 యాంఫెటమైన్ పిల్స్ ను స్వాధీనం చేసుకున్నారు. ఈ మేరకు ZATCA అధికార ప్రతినిధి హమ్మూద్ అల్-హర్బీ వివరాలను వెల్లడించారు. భద్రతా స్కానింగ్ పరికరాలు, ప్రత్యేక తనిఖీల ద్వారా బస్సును పరిశీలించగా, వాహనం కింది భాగంలో ప్రత్యేకంగా తయారు చేసిన రహస్య అరలో ఈ పిల్స్ ను దాచినట్లు గుర్తించారు.

సరిహద్దు ప్రాంతాల్లో స్మగ్లింగ్‌ను అరికట్టేందుకు కస్టమ్స్ తనిఖీలను మరింత కట్టుదిట్టం చేస్తున్నామని, ఈ విషయంలో అంతర్గత వ్యవహారాల మంత్రిత్వ శాఖ, జనరల్ డైరెక్టరేట్ ఆఫ్ నార్కోటిక్స్ కంట్రోల్ తో సమన్వయంగా పనిచేస్తున్నామని అల్-హర్బీ తెలిపారు.
అక్రమ రవాణాపై సమాచారం ఉన్నవారు 1910 హెల్ప్‌లైన్, [[email protected]](mailto:[email protected]) ఈమెయిల్ లేదా +966 11 910 అంతర్జాతీయ నంబర్ ద్వారా సమాచారం అందించాలని జాట్‌కా ప్రజలకు విజ్ఞప్తి చేసింది. సమాచారం ఇచ్చిన వారి వివరాలు గోప్యంగా ఉంచడంతో పాటు, కేసు నిర్ధారణకు దారితీసే సమాచారం అందించిన వారికి నగదు బహుమతి కూడా అందజేస్తామని పేర్కొంది.