కువైట్ : కువైట్‌లోని ఫర్వానియా ప్రాంతంలో నిర్వహించిన ఆహార భద్రత తనిఖీల్లో పలు నిబంధనల ఉల్లంఘనలు వెలుగుచూశాయి. ఈ సందర్భంగా 195.2 కిలోల కల్తీ, వినియోగానికి అనర్హమైన మాంసాన్ని అధికారులు స్వాధీనం చేసుకుని ధ్వంసం చేశారు.

పబ్లిక్ అథారిటీ ఫర్ ఫుడ్ అండ్ న్యూట్రిషన్ (PAFN) ఆధ్వర్యంలో ఫర్వానియా ఫుడ్ ఇన్‌స్పెక్షన్ కంట్రోల్ విభాగం ప్రత్యేక తనిఖీలు నిర్వహించింది. ఈ తనిఖీల్లో కల్తీ ఆహారాన్ని విక్రయించినందుకు ఒక కేసు నమోదు చేయగా, చెల్లుబాటు అయ్యే హెల్త్ సర్టిఫికెట్లు లేకుండా ఆహారాన్ని నిర్వహించిన ఇద్దరు కార్మికులకు సంబంధించి రెండు ఉల్లంఘనలు నమోదు చేశారు.

అదేవిధంగా, అవసరమైన హెల్త్ సర్టిఫికేట్ లేని ఉద్యోగిని విధుల్లోకి తీసుకున్న యజమానిపై కూడా మరో ఉల్లంఘన నమోదు చేశారు. తనిఖీల్లో స్వాధీనం చేసుకున్న 195.2 కిలోల మాంసం మానవ వినియోగానికి పూర్తిగా అనర్హమని నిర్ధారించిన అధికారులు, చట్టపరమైన నిబంధనల ప్రకారం దానిని పూర్తిగా ధ్వంసం చేశారు.

ఆహార భద్రతకు అత్యంత ప్రాధాన్యం ఇస్తున్నట్లు పేర్కొన్న అధికారులు, ప్రజల ఆరోగ్యాన్ని కాపాడేందుకు రాష్ట్రవ్యాప్తంగా తనిఖీలు కొనసాగుతాయని, నిబంధనలు ఉల్లంఘించే ఆహార సంస్థలపై కఠిన చర్యలు తీసుకుంటామని హెచ్చరించారు.