హైదరాబాద్: కష్టాల్లో ఉన్న సామాన్య ప్రజలకు బాసటగా నిలవడంలో సిద్దిపేట శాసనసభ్యులు, మాజీ మంత్రి హరీష్ రావు ఎప్పుడూ ముందుంటారు. తాజాగా ఆయన మరోసారి తన ఉదార స్వభావాన్ని చాటుకున్నారు. నాలుగేళ్ల క్రితం తండ్రిని కోల్పోయి చదువుకునే పరిస్థితి లేక ఇబ్బందులు పడిన సిద్దిపేట చిన్నారి అఖిలకు ఆయన వెన్నంటి నిలిచారు. తాజాగా ఆ విద్యార్థిని నీట్ ప్రవేశ పరీక్షలో అద్భుతమైన మార్కులు సాధించడంతో, ఆమెను తన ఇంటికి స్వయంగా ఆహ్వానించి అభినందించడమే కాకుండా, ఎంబీబీఎస్ చదువుకయ్యే పూర్తి ఖర్చులను తానే భరిస్తానని గొప్ప హామీ ఇచ్చి పెద్ద మనసును చాటుకున్నారు.

తండ్రి మరణంతో ఆగిపోయే దశలో ఉన్న విద్యకు అండగా నిలిచిన నాయకుడు
ఈ స్ఫూర్తిదాయక ఉదంతం పూర్తి వివరాల్లోకి వెళితే.. సిద్దిపేటకు చెందిన అఖిల అనే విద్యార్థిని తండ్రి నాలుగేళ్ల క్రితం అనూహ్యంగా మరణించారు. దీంతో ఆ కుటుంబం తీవ్రమైన ఆర్థిక సంక్షోభంలో చిక్కుకుంది. ఆ సమయంలో అఖిల చదువు మధ్యలోనే ఆగిపోయే దుస్థితి ఏర్పడింది. ఈ విషయం తెలుసుకున్న అప్పట్లోనే మాజీ మంత్రి హరీష్ రావు స్పందించి ఆ కుటుంబానికి అండగా నిలిచారు. అప్పట్నుంచి 9వ తరగతి నుంచి ఇంటర్మీడియట్ పూర్తి అయ్యే వరకు ఆ బాలిక విద్యాభ్యాసానికి కావలసిన సంపూర్ణ ఖర్చులను ఆయనే స్వయంగా భరిస్తూ వచ్చారు.

Harish Rao: నీట్‌లో అద్భుత ప్రతిభ: హైదరాబాద్ నివాసానికి ఆహ్వానించి ఆత్మీయ ఆతిథ్యం
హరీష్ రావు అందించిన ఆర్థిక భరోసా మరియు ప్రోత్సాహంతో ఎంతో కష్టపడి చదివిన అఖిల.. ఇటీవల వెలువడిన నీట్ ప్రవేశ పరీక్ష ఫలితాలలో 453 మార్కులు సాధించి తన ప్రతిభను చాటుకుంది. విద్యార్థిని మంచి మార్కులు సాధించిన విషయం తెలుసుకున్న హరీష్ రావు వెంటనే స్పందించి, అఖిలను, ఆమె తల్లి రేణుకను హైదరాబాద్‌లోని తన అధికారిక నివాసానికి సాదరంగా ఆహ్వానించారు. తన ఇంటికి వచ్చిన ఆ కుటుంబ సభ్యులతో ఎంతో ఆత్మీయంగా ముచ్చటించారు. అంతేకాకుండా, వారికి స్వయంగా భోజనం వడ్డించి, వారితో పాటు కూర్చుని సహపంక్తి భోజనం చేశారు.

ఎంబీబీఎస్ పూర్తి బాధ్యత నాదే: భవిష్యత్తుకు కొండంత ధైర్యంనిచ్చిన హరీష్ రావు

ఈ సందర్భంగా అఖిలతో మాట్లాడిన హరీష్ రావు అభయమిస్తూ.. “అఖిలా.. నీకు ఎంబీబీఎస్ సీటు ఎక్కడొచ్చినా సరే, నిన్ను మెడిసిన్ చదివించే పూర్తి బాధ్యత నాదే. కాలేజీ ఫీజులు అన్నీ నేనే పూర్తిగా భరిస్తాను” అని కొండంత భరోసానిచ్చారు. భవిష్యత్తులో బాగా కష్టపడి చదివి మంచి డాక్టర్‌గా పేరు తెచ్చుకుని, నలుగురికి వైద్య సేవలు అందించాలని ఆమెను దీవించారు. కష్టపడే తత్వం ఉన్న పేద విద్యార్థులకు తాను ఎప్పుడూ అండగా ఉంటానని మరోసారి నిరూపించారు.