రియాద్: ఒబెసిటీతో బాధపడుతున్న పెద్దలకు దీర్ఘకాలికంగా బరువు తగ్గించడంతో పాటు తగ్గిన బరువును కొనసాగించేందుకు ఉపయోగించే తొలి ఓరల్ డ్రగ్ ఫౌండాయో (Foundaio) నమోదుకు సౌదీ ఆహార, ఔషధ ప్రాధికార సంస్థ (SFDA) ఆమోదం తెలిపింది. ఆర్ఫోర్గ్లిప్రాన్ (Orforglipron) అనే పదార్థం కలిగిన ఈ మెడిసిన్ ను ఆరోగ్యకరమైన ఆహారం, క్రమం తప్పని వ్యాయామంతో పాటు ఉపయోగించాలని ఎస్‌ఎఫ్‌డీఏ సూచించింది. ఒబెసిటీ లేదా అధిక బరువుతో పాటు కనీసం ఒక బరువు సంబంధిత ఆరోగ్య సమస్య ఉన్న పెద్దలకు ఈ మందు ఉపయోగపడుతుందని వెల్లడించింది.

ఈ మెడిసిన్ గ్లూకాగాన్-లైక్ పెప్టైడ్-1 (GLP-1) రిసెప్టర్లను ఉత్తేజపరచడం ద్వారా ఆకలిని నియంత్రించడంతో పాటు రక్తంలో షుగర్ స్థాయిలను బ్యాలెన్స్ చేస్తుంది. దీంతో ఆహారం తీసుకునే పరిమాణం తగ్గి, దీర్ఘకాలికంగా బరువు తగ్గేందుకు సహాయపడుతుంది. ఇతర జీఎల్పీ-1 చికిత్సలతో పోలిస్తే ఇది రోజుకు ఒక్కసారి నోటి ద్వారా తీసుకునే పిల్ కావడం విశేషం. ఈ మెడిసిన్ భద్రత, ప్రభావం, నాణ్యతపై సమగ్ర పరిశీలన అనంతరం 72 వారాల పాటు నిర్వహించిన రెండు కీలకమైన మూడో దశ క్లినికల్ పరీక్షల ఫలితాల ఆధారంగా అనుమతి మంజూరు చేసినట్లు ఎస్‌ఎఫ్‌డీఏ తెలిపింది.

ఈ మందు వాడినవారిలో వికారం, మలబద్ధకం, విరేచనాలు, వాంతులు, అజీర్ణం, కడుపునొప్పి వంటి జీర్ణాశయ సంబంధిత దుష్ప్రభావాలు ఎక్కువగా కనిపించాయని ఎస్‌ఎఫ్‌డీఏ తెలిపింది. అలాగే కడుపు ఉబ్బరం, జుట్టు రాలడం, అలసట వంటి సమస్యలు కూడా కొందరిలో నమోదయ్యాయి. అయితే ఈ లక్షణాలు ఎక్కువగా స్వల్ప లేదా మధ్యస్థ స్థాయిలో ఉండి, మోతాదు పెంచే ప్రారంభ దశలోనే కనిపించి అనంతరం తగ్గిపోయాయని పేర్కొంది.

కాగా, కొన్ని రకాల థైరాయిడ్ క్యాన్సర్ వ్యక్తిగత లేదా కుటుంబ చరిత్ర ఉన్నవారు, అలాగే సంబంధిత వంశపారంపర్య వ్యాధులు ఉన్నవారు ఈ మందును వాడరాదని ఎస్‌ఎఫ్‌డీఏ హెచ్చరించింది. వైద్యుల పర్యవేక్షణలో, క్రమం తప్పని వైద్య పరీక్షలతో మాత్రమే ఈ చికిత్స కొనసాగించాలని సూచించింది.