కువైట్ : కింగ్ ఫహద్ బిన్ అబ్దుల్ అజీజ్ అల్ సౌద్ రోడ్డు (రోడ్ నంబర్ 40) ను పాక్షికంగా మూసివేయనున్నట్లు జనరల్ డైరెక్టరేట్ ఆఫ్ ట్రాఫిక్ ప్రకటించింది. ఈ ట్రాఫిక్ ఆంక్షలు ఆగస్టు 8 నుంచి వారం రోజులపాటు అమల్లో ఉంటాయని పేర్కొన్నది.

కింగ్ ఫహద్ రోడ్డులోని కుడివైపు రెండు లేన్లను తాత్కాలికంగా మూసివేయనున్నారు. అలాగే బయాన్ ప్రాంతానికి ఎదురుగా ఉన్న షేక్ జాయెద్ బిన్ సుల్తాన్ అల్ నహ్యాన్ రోడ్ (ఫిఫ్త్ రింగ్ రోడ్) వైపు వెళ్లే బ్రాంచ్ ఎంట్రన్స్‌ను కూడా మూసివేయనున్నారు.

మూసివేత సమయంలో వాహనదారులు అప్రమత్తంగా ఉండాలని ట్రాఫిక్ అధికారులు సూచించారు. రహదారిపై ఏర్పాటు చేసే ట్రాఫిక్ సూచనలు, మార్గదర్శకాలను తప్పనిసరిగా పాటించాలని కోరారు. వీలైనంత వరకు ప్రత్యామ్నాయ మార్గాలను వినియోగించాలని సూచించారు.

ముఖ్యంగా రద్దీ సమయాల్లో ఈ మార్పుల కారణంగా ట్రాఫిక్ రాకపోకలకు అంతరాయం ఏర్పడే అవకాశం ఉందని అధికారులు తెలిపారు. కింగ్ ఫహద్ రోడ్డును ఉపయోగించే వాహనదారులు ప్రయాణ సమయాన్ని ముందుగానే ప్లాన్ చేసుకుని, ట్రాఫిక్ రద్దీని దృష్టిలో ఉంచుకోవాలని సూచించారు.