తిరుపతి: శ్రీవారి దర్శనం కోసం విదేశాల నుంచి తిరుపతికి వచ్చే భక్తులకు కేంద్ర ప్రభుత్వం శుభవార్త అందించింది. ఇకపై విదేశీ ప్రయాణికులకు తిరుపతి విమానాశ్రయంలోనే ఈ-వీసా సేవలు అందుబాటులోకి రానున్నాయి. ఈ మేరకు కేంద్ర పౌర విమానయాన శాఖ కీలక నిర్ణయం తీసుకుంది.

ఇప్పటివరకు విదేశీ భక్తులు తిరుపతికి రావాలంటే ముందుగా చెన్నై, బెంగళూరు లేదా హైదరాబాద్ వంటి నగరాలకు చేరుకుని అక్కడే వీసా సంబంధిత ప్రక్రియలను పూర్తి చేసిన అనంతరం తిరుపతికి ప్రయాణించాల్సి వచ్చేది. దీంతో శ్రీవారి దర్శనం కోసం వచ్చే విదేశీ భక్తులకు అదనపు ప్రయాణం, సమయం, ఖర్చు భారంగా మారేది.

తాజా నిర్ణయంతో తిరుపతి విమానాశ్రయంలోనే ఈ-వీసా ప్రక్రియను పూర్తి చేసుకునే అవకాశం కలగనుంది. దీంతో భవిష్యత్తులో అంతర్జాతీయ విమాన సర్వీసులు అందుబాటులోకి వస్తే విదేశాల నుంచి వచ్చే ప్రయాణికులు నేరుగా తిరుపతి విమానాశ్రయానికి చేరుకుని అవసరమైన ఇమ్మిగ్రేషన్, ఈ-వీసా ప్రక్రియలను పూర్తి చేసుకునే అవకాశం ఉంటుంది.

ముందుగానే ఈ-వీసా పొందాల్సిందే

అయితే విదేశీ ప్రయాణికులు తమ ప్రయాణానికి కనీసం 10 రోజుల ముందే ఆన్‌లైన్‌లో ఈ-వీసా కోసం దరఖాస్తు చేసుకుని అనుమతి పొందాల్సి ఉంటుంది. విమానాశ్రయంలో అందుబాటులోకి వచ్చే కౌంటర్ ద్వారా ప్రయాణికులకు సంబంధిత ప్రక్రియలో సౌకర్యం కల్పించనున్నారు.

ప్రస్తుతం తిరుపతి విమానాశ్రయం నుంచి అంతర్జాతీయ విమాన సర్వీసులు అందుబాటులో లేనప్పటికీ, భవిష్యత్ అవసరాలను దృష్టిలో ఉంచుకుని కేంద్ర పౌర విమానయాన శాఖ ఇప్పటికే ఈ-వీసా కౌంటర్‌కు అనుమతి మంజూరు చేసింది. దీంతో త్వరలోనే తిరుపతి నుంచి అంతర్జాతీయ విమాన సర్వీసులు ప్రారంభమయ్యే అవకాశాలపై ఆశలు పెరిగాయి.

2007లోనే అంతర్జాతీయ హోదా

తిరుపతి విమానాశ్రయానికి అంతర్జాతీయ హోదా కల్పించే దిశగా కేంద్ర ప్రభుత్వం 2007లోనే కీలక నిర్ణయం తీసుకుంది. కేంద్ర కేబినెట్ తిరుపతి విమానాశ్రయాన్ని అంతర్జాతీయ విమానాశ్రయంగా అభివృద్ధి చేయడానికి నిర్ణయించగా, 2017లో దీనికి సంబంధించి అధికారిక నోటిఫికేషన్ విడుదలైంది.

తిరుపతి శ్రీ వేంకటేశ్వర స్వామి ఆలయానికి ప్రతి ఏడాది దేశ, విదేశాల నుంచి భారీ సంఖ్యలో భక్తులు వస్తుంటారు. అంతర్జాతీయ విమాన సర్వీసులు, ఈ-వీసా సదుపాయం పూర్తిస్థాయిలో అందుబాటులోకి వస్తే విదేశీ భక్తులకు ప్రయాణం మరింత సులభతరం కావడంతో పాటు తిరుపతి అంతర్జాతీయ పర్యాటక, ఆధ్యాత్మిక కేంద్రంగా మరింత అభివృద్ధి చెందే అవకాశం ఉంది.