రియాద్: కొత్త విద్యా సంవత్సరం ప్రారంభానికి సన్నాహాలు ముమ్మరమైన నేపథ్యంలో సౌదీ అరేబియా వాణిజ్య మంత్రిత్వ శాఖ దేశవ్యాప్తంగా పుస్తక దుకాణాలు, స్టేషనరీ షాపులపై విస్తృత తనిఖీలు చేపట్టింది. మంత్రిత్వ శాఖ అధికారులు మొత్తం 2,259 తనిఖీలు నిర్వహించారు. విద్యార్థులకు అవసరమైన పాఠశాల సామగ్రి అందుబాటులో ఉందా? ప్రత్యామ్నాయ ఉత్పత్తులు ఉన్నాయా? ధరలు స్థిరంగా ఉన్నాయా? అనే అంశాలను అధికారులు పరిశీలించారు.

అలాగే దుకాణాల్లో విక్రయించే ఉత్పత్తులపై ధరల ట్యాగ్ లేదా ఎలక్ట్రానిక్ ధర సమాచారం తప్పనిసరిగా ఉందా అనే విషయాన్ని తనిఖీ చేశారు. వాణిజ్య డిస్కౌంట్లు నిబంధనలకు అనుగుణంగా ఉన్నాయా? అనే అంశంపైనా దృష్టి సారించారు. వినియోగదారుల హక్కులను పరిరక్షించడంతో పాటు, వ్యాపార సంస్థలు వాణిజ్య మంత్రిత్వ శాఖ చట్టాలు, నిబంధనలను పాటించేలా చూడటమే ఈ తనిఖీల ప్రధాన ఉద్దేశమని అధికారులు తెలిపారు.