కువైట్ : ఫస్ట్ క్లాస్, బిజినెస్ క్లాస్‌లో బుక్ చేసుకున్న ప్రయాణికుల టికెట్లను ఎకానమీ క్లాస్‌కు మారుస్తున్నారన్న వార్తలను కువైట్ ఎయిర్‌వేస్ ఖండించింది. ఈ వార్తల్లో ఎలాంటి వాస్తవం లేదని ఆదివారం విడుదల చేసిన ప్రకటనలో స్పష్టం చేసింది. ఏదైనా ఆపరేషనల్ కారణాల వల్ల ప్రయాణికుడి బుకింగ్‌లో మార్పు చేయాల్సి వస్తే, నిర్ణీత విధానాల ప్రకారం పరిస్థితిని పరిష్కరిస్తామని ఎయిర్‌లైన్ తెలిపింది. అలాంటి సందర్భాల్లో ప్రయాణికులను నేరుగా సంప్రదించి పూర్తి సమాచారం అందిస్తామని పేర్కొంది. అలాగే అంతర్జాతీయ ప్రమాణాలు, నిబంధనల ప్రకారం ప్రయాణికులకు లభించాల్సిన పరిహారం సహా అన్ని హక్కులను కాపాడుతామని వెల్లడించింది.

ప్రయాణికులు బుక్ చేసుకున్న క్లాస్, ధృవీకరించిన బుకింగ్‌లకు కట్టుబడి ఉండటమే తమ సంస్థ విధానమని కువైట్ ఎయిర్‌వేస్ తెలిపింది. ప్రయాణికులకు అర్హమైన సేవలను అందించడంతో పాటు, అదనపు ఆర్థిక భారం లేదా ఇతర ఇబ్బందులు కలగకుండా చూస్తామని స్పష్టం చేసింది. తమ బుకింగ్‌లు, విమానాల వివరాలపై సమాచారం కోసం ప్రయాణికులు కువైట్ ఎయిర్‌వేస్ అధికారిక కమ్యూనికేషన్ ఛానళ్లను మాత్రమే ఉపయోగించాలని కువైట్ ఎయిర్‌వేస్ సూచించింది.