కువైట్ :భారత్, కువైట్ దేశాల మధ్య ఆహార భద్రత సహా పలు కీలక రంగాల్లో సహకారాన్ని మరింత బలోపేతం చేసేందుకు చర్చలు జరిగాయి. కువైట్ వాణిజ్య, పరిశ్రమల మంత్రి ఉసామా బుదాయ్, కువైట్‌లో భారత రాయబారి పరమితా త్రిపాఠితో సమావేశమై ద్వైపాక్షిక సంబంధాల విస్తరణకు ఉన్న అవకాశాలపై చర్చించారు.

కువైట్ వాణిజ్య మంత్రిత్వ శాఖ విడుదల చేసిన ప్రకటన ప్రకారం.. భారత్, కువైట్ మధ్య వాణిజ్య, ఆర్థిక, పారిశ్రామిక, పెట్టుబడి సంబంధాలను మరింత అభివృద్ధి చేసే మార్గాలపై ఇరుపక్షాలు చర్చించాయి. ముఖ్యంగా ఆహార భద్రత రంగంలో సంయుక్త సహకారం, కువైట్ వ్యూహాత్మక ఆహార నిల్వలను బలోపేతం చేసే చర్యలపై దృష్టి సారించారు. ఇరు దేశాలకు పరస్పరం ప్రయోజనం చేకూర్చే రంగాలను గుర్తించి ఆర్థిక సంబంధాలను మరింత విస్తరించే అవకాశాలను పరిశీలించారు.

అదేవిధంగా, ఇరు దేశాలకు సంబంధించిన పలు అంశాలపై అభిప్రాయాలను పంచుకున్నారు. ప్రాధాన్యత కలిగిన రంగాల్లో ద్వైపాక్షిక సహకారాన్ని పెంచడం ద్వారా భారత్–కువైట్ సంబంధాలను మరింత బలోపేతం చేయాలని నిర్ణయించారు. ఇరు దేశాలు తమ ఆర్థిక భాగస్వామ్యాన్ని మరింత లోతుగా చేసుకోవడంతో పాటు కీలక రంగాల్లో సహకారాన్ని విస్తరించేందుకు కొనసాగిస్తున్న ప్రయత్నాల్లో భాగంగానే తాజా చర్చలు జరిగినట్లు అధికారులు తెలిపారు.