ఒక్కసారిగా చూస్తే పక్కన వున్న చిత్రంలోని వ్యక్తి బాహుబలిలో కట్టప్ప అని పొరపాటు పడే అవకాశముంది. ఎంత పరికించి చూసినా ఆ స్టిల్‌లో యుద్ధప్రభువు గెటప్‌లో వున్నది తమిళ నటుడు కార్తీ అని గుర్తుపట్టడం కష్టమే. ఇటీవల విడుదల చేసిన కాష్మోరా చిత్రంలో కార్తీ శత్రుభయంకరమైన వినూత్న అవతారం ఇప్పుడు దక్షిణాదిలో అందరినీ ఆకట్టుకుంటోంది. 

కార్తీ కథానాయకుడిగా నటిస్తున్న ఈ చిత్రాన్ని పీవీపీ సినిమా, డ్రీమ్ వారియర్ పతాకాలపై పెరల్ వి పొట్లూరి, పరమ్ వి పొట్లూరి, కెవిన్ అన్నె, ఎస్.ఆర్. ప్రకాష్‌బాబు, ఎస్. ఆర్.ప్రభు నిర్మిస్తున్నారు. గోకుల్ దర్శకుడు. సూపర్ నేచురల్ హిస్టారికల్ హారర్ థ్రిల్లర్‌గా రూపొందుతున్న ఈ సినిమా తాలూకు ఫస్ట్‌లుక్‌ను విడుదల చేశారు.

నిర్మాతలు చిత్ర విశేషాలు తెలియజేస్తూ విలక్షణ ఆహార్యంతో కూడిన కార్తీ గెటప్ గురించి దాదాపు 7 నెలల శ్రమించాం. 47 గెటప్స్‌ను పరిశీలించి అందులో విభిన్నంగా అనిపించిన దానిని ఖరారు చేశాం. ఈ సినిమాలో హారర్ అంశాలతో పాటు చారిత్రక నేపథ్యం కూడా వుంటుంది. ఒక ఎపిసోడ్‌లో కార్తీ రాజ్ నాయక్ అనే సైన్యాధిపతిగా, నయనతార రతిన మహాదేవి పాత్రల్లో కనిపిస్తారు.

ఓ ఊహాజనిత సామ్రాజ్యంలో వారి పాత్రలు అత్యంత శక్తివంతగా సాగుతాయి. యుద్ధవీరుడిగా కార్తీ పాత్ర ఆద్యంతం రొమాంచితంగా వుంటుంది అన్నారు.