అబుదాబి: డ్రైవర్ లేకుండా నడిచే సెల్ఫ్ డ్రైవింగ్ వాహనాల వినియోగానికి యూఏఈ ప్రభుత్వం కొత్త నియంత్రణ చట్టాన్ని ఆమోదించింది. దేశవ్యాప్తంగా సెల్ఫ్ డ్రైవింగ్ వాహనాల ప్రయోగాలు, వాణిజ్య సేవలు వేగం పుంజుకుంటున్న నేపథ్యంలో ఈ చట్టం డ్రైవర్‌లెస్ రవాణా వ్యవస్థకు సమగ్ర నియంత్రణ వ్యవస్థను అందించనుంది.
యూఏఈ ఉపాధ్యక్షుడు, ప్రధానమంత్రి, దుబాయ్ పాలకుడు షేక్ మొహమ్మద్ బిన్ రషీద్ అల్ మక్తూమ్ అధ్యక్షతన అబుదాబిలోని ఖస్ర్ అల్ వతన్ (Qasr Al Watan)లో జరిగిన సమావేశంలో ఈ మేరకు నిర్ణయం తీసుకున్నారు.

తనిఖీ నుంచి లైసెన్సింగ్ వరకు కొత్త నిబంధనలు

కొత్త ఫెడరల్ చట్టం ప్రకారం సెల్ఫ్ డ్రైవింగ్ వాహనాల తనిఖీ, రిజిస్ట్రేషన్, లైసెన్సింగ్‌కు సంబంధించిన నిబంధనలు అమల్లోకి రానున్నాయి. కొత్త వాహన సాంకేతికతలను కంపెనీలు ఏ విధంగా పరీక్షించాలి అనే అంశంపైనా స్పష్టమైన మార్గదర్శకాలను చట్టం నిర్దేశిస్తుంది. అలాగే వాహన ఏజెంట్లు, ఆపరేటర్లు, ప్రయాణికుల బాధ్యతలను ఈ చట్టం స్పష్టంగా నిర్వచించింది. సెల్ఫ్ డ్రైవింగ్ వాహనాలకు సంబంధించి ఫెడరల్, స్థానిక ప్రభుత్వ సంస్థల అధికారాలు, బాధ్యతలపై కూడా చట్టంలో నిబంధనలు ఉన్నాయి.

పర్యావరణం, రోడ్డు భద్రతకు ప్రాధాన్యం

పర్యావరణానికి అనుకూలమైన స్వచ్ఛమైన సాంకేతికతల వినియోగాన్ని ప్రోత్సహించడం ఈ చట్టం ప్రధాన లక్ష్యాల్లో ఒకటని ప్రభుత్వం తెలిపింది. రహదారులపై కాలుష్యాన్ని, ట్రాఫిక్ రద్దీని తగ్గించడంతో పాటు రోడ్డు భద్రతను మెరుగుపరచడం, సెల్ఫ్ డ్రైవింగ్ వాహనాలకు సంబంధించిన ప్రమాదాలను తగ్గించడం కూడా లక్ష్యంగా పెట్టుకుంది. 
ఈ ఫెడరల్ చట్టంతో యూఏఈలోని ఏడు ఎమిరేట్లకు వర్తించే యూనిఫైడ్ సెల్ఫ్ డ్రైవింగ్ వాహన నియంత్రణ వ్యవస్థ ఏర్పడేందుకు మార్గం సుగమమవుతుంది. దేశవ్యాప్తంగా ఒకే విధమైన నిబంధనలు అమలు చేయడంతో పాటు ఈ వేగంగా అభివృద్ధి చెందుతున్న రంగంలో ఆవిష్కరణలకు కూడా ప్రోత్సాహం లభించనుంది.

2030 నాటికి 25%.. దుబాయ్ లక్ష్యం

దుబాయ్‌లో ఇప్పటికే సెల్ఫ్ డ్రైవింగ్ వాహనాలకు సంబంధించి ప్రత్యేక చట్టాలు అమల్లో ఉన్నాయి. 2023లో వాణిజ్య సెల్ఫ్ డ్రైవింగ్ వాహన సేవల నిర్వహణకు సంబంధించిన నిబంధనలను ప్రవేశపెట్టారు. దుబాయ్ రోడ్స్ అండ్ ట్రాన్స్‌పోర్ట్ అథారిటీ (ఆర్‌టీఏ) నియంత్రణలో ఉన్న ఈ వ్యవస్థ ప్రకారం, ప్రత్యేక లైసెన్స్ లేకుండా ఏ సెల్ఫ్ డ్రైవింగ్ వాహనం కూడా ప్రజా రహదారులపై ప్రయాణించడానికి అనుమతి లేదు. 2030 నాటికి దుబాయ్‌లో మొత్తం ప్రయాణాల్లో 25 శాతం ప్రయాణాలను స్మార్ట్, డ్రైవర్‌లెస్ రవాణా ద్వారా నిర్వహించాలనే లక్ష్యాన్ని దుబాయ్ నిర్దేశించుకుంది.
ఈ ఏడాది ఫిబ్రవరిలో దుబాయ్ యువరాజు షేక్ హమ్దాన్ బిన్ మొహమ్మద్ బిన్ రషీద్ అల్ మక్తూమ్ సెల్ఫ్ డ్రైవింగ్ టాక్సీ సేవల అధికారిక కార్యకలాపాలను ప్రారంభించాలని ఆదేశించారు. ఈ సేవల్లో 100 సెల్ఫ్ డ్రైవింగ్ వాహనాలతో కూడిన ఫ్లీట్‌ను వినియోగించనున్నారు.

ఉబర్‌లో అపోలో గో డ్రైవర్‌లెస్ టాక్సీలు

గత నెలలో "Uber Technologies" కు చెందిన పూర్తిస్థాయి డ్రైవర్‌లెస్ Apollo Go వాహనాలను దుబాయ్‌లో తమ ప్లాట్‌ఫామ్ ద్వారా బుక్ చేసుకునే అవకాశం అందుబాటులోకి వచ్చినట్లు ప్రకటించింది. దుబాయ్‌లో UberX లేదా Uber Comfort సేవలను బుక్ చేసుకునే ప్రయాణికులకు పూర్తిగా డ్రైవర్ లేకుండా నడిచే Apollo Go వాహనం కేటాయించబడే అవకాశం ఉంది. ప్రారంభ దశలో ఈ సేవలను ఉమ్ సుకీమ్, జుమైరా ప్రాంతాల్లోని ఎంపిక చేసిన ప్రాంతాల్లో అందుబాటులో ఉంచి, భవిష్యత్తులో సేవలను మరిన్ని ప్రాంతాలకు విస్తరించాలని యోచిస్తున్నారు.

అబుదాబిలోనూ డ్రైవర్‌లెస్ వాహనాలకు అనుమతులు

అబుదాబి కూడా సెల్ఫ్ డ్రైవింగ్ వాహనాల రంగంలో ముందడుగు వేసింది. ఇటీవల ఈ ప్రాంతంలో పూర్తిస్థాయి డ్రైవర్‌లెస్ కార్లకు మొదటి ఆపరేటింగ్ అనుమతులు జారీ చేసింది. అలాగే రహదారులపై ఈ వాహనాలను అధికారులు సులభంగా గుర్తించేందుకు ప్రత్యేక నీలి రంగు లైసెన్స్ ప్లేట్లను కూడా ప్రవేశపెట్టింది. కొత్త ఫెడరల్ చట్టం అమలుతో యూఏఈలో డ్రైవర్‌లెస్ రవాణా సేవల విస్తరణకు మరింత ఊతం లభించడంతో పాటు, భవిష్యత్తులో సెల్ఫ్ డ్రైవింగ్ కార్లు, టాక్సీలు దేశ రవాణా వ్యవస్థలో కీలక పాత్ర పోషించే అవకాశం ఉంది.