అబుదాబి: సౌదీ అరేబియాలోని ప్రసిద్ధ రెడ్ సీ తీర ప్రాంతానికి ఎతిహాద్ ఎయిర్‌వేస్ విమాన సర్వీసులను ప్రారంభించనుంది. అక్టోబర్ 4, 2026 నుంచి రెడ్ సీ ఇంటర్నేషనల్ ఎయిర్‌పోర్ట్‌కు విమానాలను నడపనున్నట్లు ఎతిహాద్ ప్రకటించింది.

అబుదాబి నుంచి కేవలం మూడు గంటలకు పైగా ప్రయాణంతో చేరుకోగల ఈ కొత్త గమ్యస్థానం ద్వారా ఏడాది పొడవునా రెడ్ సీ ప్రాంతాన్ని సందర్శించే అవకాశం ప్రయాణికులకు లభించనుంది. ఎతిహాద్ నెట్‌వర్క్‌లోని వివిధ ప్రాంతాల నుంచి వచ్చే ప్రయాణికులు అబుదాబిలో ఒకసారి కనెక్ట్ అయి రెడ్ సీకి చేరుకోవచ్చు. ముఖ్యంగా గల్ఫ్ ప్రాంతంతో పాటు భారత ఉపఖండంలోని ప్రయాణికులకు ఈ సర్వీసులు మరింత సౌకర్యాన్ని అందించనున్నాయి.

రెడ్ సీ ప్రాంతం సౌదీ అరేబియాలో ఎతిహాద్‌కు ఆరవ గమ్యస్థానం కానుంది. ప్రస్తుతం రియాద్, జెడ్డా, దమ్మామ్, మదీనా, అల్ ఖాసిమ్ నగరాలకు ఎతిహాద్ విమానాలను నడుపుతోంది.

ఎతిహాద్ ఎయిర్‌వేస్ చీఫ్ ఎగ్జిక్యూటివ్ ఆఫీసర్ అంటోనాల్డో నెవెస్ మాట్లాడుతూ, సాధారణంగా దీవులు, పగడపు దిబ్బలు, విశ్రాంతి కోసం ప్రయాణికులు సుదూర విమాన ప్రయాణాలు చేస్తారని, అయితే ఇప్పుడు అలాంటి విహార అనుభవం అబుదాబి నుంచి తక్కువ ప్రయాణంతోనే అందుబాటులోకి వస్తుందని తెలిపారు.

సర్వీసుల వివరాలు: అక్టోబర్ 4 నుంచి అబుదాబి–రెడ్ సీ మధ్య వారానికి ఒక విమాన సర్వీస్ ప్రారంభం కానుంది. అక్టోబర్ 25, 2026 నుంచి ఈ సర్వీసులను వారానికి రెండు విమానాలకు పెంచనున్నారు.

ఈ కొత్త మార్గంతో సౌదీ అరేబియాలోని రెడ్ సీ తీర ప్రాంతానికి అంతర్జాతీయ పర్యాటకుల రాక మరింత పెరిగే అవకాశం ఉంది.