దోహా: ఖతార్ ప్రభుత్వం ఉద్యోగుల వేతనాల చెల్లింపులకు సంబంధించిన వేజ్ ప్రొటెక్షన్ సిస్టమ్ (WPS) నిబంధనల్లో కీలక మార్పులు చేసింది. కార్మిక మంత్రిత్వ శాఖ జారీ చేసిన మినిస్టీరియల్ డెసిషన్ నంబర్ 50 ఆఫ్ 2026 ద్వారా ఈ సవరణలు అమల్లోకి వచ్చాయి. ఈ నిర్ణయం న్యాయ మంత్రిత్వ శాఖ ప్రచురించిన అధికారిక గెజిట్ 15వ సంచికలో వెల్లడైంది.

కొత్త నిబంధనల ప్రకారం, వార్షిక లేదా నెలవారీ ప్రాతిపదికన వేతనాలు పొందే ఉద్యోగుల జీతాలను, వేతనం చెల్లించాల్సిన తేదీ నుంచి ఏడు రోజుల్లోగా ఖతార్‌లోని ఆర్థిక సంస్థల్లో ఉద్యోగుల ఖాతాలకు బదిలీ చేయాలి. ఈ చెల్లింపులు తప్పనిసరిగా వేజ్ ప్రొటెక్షన్ సిస్టమ్ (WPS) ద్వారా జరగాలి.

ప్రతి నెల మొదటి తేదీన వేతనం చెల్లించాల్సిందే
వార్షిక లేదా నెలవారీ వేతన విధానంలో పనిచేసే ఉద్యోగులకు ప్రతి నెల మొదటి రోజునే వేతనం బకాయి అవుతుంది. ఆ తేదీ నుంచి గరిష్ఠంగా ఏడు రోజుల్లోగా సంబంధిత ఉద్యోగి ఖాతాలో జీతం జమ చేయాల్సి ఉంటుంది.

ఇతర వేతన విధానంలో పనిచేసే కార్మికులకు మాత్రం ప్రతి రెండు వారాల వ్యవధి ప్రారంభమైన మొదటి రోజున వేతనం చెల్లించాల్సి ఉంటుంది.

ఉద్యోగుల హక్కులకు రక్షణ
వేతనాలు సమయానికి చెల్లించేలా పర్యవేక్షించేందుకు ఖతార్‌లో WPS వ్యవస్థను అమలు చేస్తున్నారు. తాజా సవరణలతో వేతనాల చెల్లింపులో స్పష్టత పెరగడంతో పాటు, ఉద్యోగులకు నిర్ణీత సమయంలో జీతాలు అందేలా నిబంధనలు మరింత కట్టుదిట్టం కానున్నాయి.

కొత్త నిబంధనలు ఖతార్‌లోని యజమానులు, సంస్థలు మరియు కార్మికులపై ప్రత్యక్ష ప్రభావం చూపనున్నాయి. ముఖ్యంగా నెలవారీ వేతనాలు పొందే ఉద్యోగుల జీతాలను నిర్ణీత గడువులోగా బ్యాంకు ఖాతాల్లో జమ చేయడం యజమానుల బాధ్యతగా మారింది.

--రాజ్ కుమార్ వనంబత్తిన(మాగల్ఫ్ ప్రతినిధి,ఖతార్)