మక్కా: పర్యావరణ నిబంధనలను ఉల్లంఘిస్తూ అక్రమంగా మట్టి, అవక్షేపాలను (Sediment) తవ్విన ఐదుగురు పాకిస్థాన్‌ పౌరులను సౌదీ అరేబియాలోని స్పెషల్ ఫోర్సెస్ ఫర్ ఎన్విరాన్‌మెంటల్ సెక్యూరిటీ (SFES) అరెస్ట్ చేసింది. 

మక్కా ప్రాంతంలో పర్యావరణ నిబంధనలకు విరుద్ధంగా అక్రమంగా అవక్షేపాలను వెలికితీస్తున్నట్లు గుర్తించిన అధికారులు ఐదుగురు పాకిస్థాన్‌ నివాసితులను అదుపులోకి తీసుకున్నారు. వారిపై అమల్లో ఉన్న చట్టాల ప్రకారం చట్టపరమైన చర్యలు ప్రారంభించారు. అక్రమ తవ్వకాలు, మట్టి తరలింపునకు ఉపయోగించిన 5 పరికరాలను అధికారులు స్వాధీనం చేసుకున్నారు. పర్యావరణానికి లేదా వన్యప్రాణులకు హాని కలిగించే కార్యకలాపాలను నిరంతరం పర్యవేక్షిస్తూ, వాటికి పాల్పడే వారిని గుర్తించి చర్యలు తీసుకుంటున్నామని SFES వెల్లడించింది.

ఇలాంటి పర్యావరణ ఉల్లంఘనలు కనిపిస్తే ప్రజలు అధికారులకు సమాచారం ఇవ్వాలని SFES సూచించింది. మక్కా, మదీనా, రియాద్‌, తూర్పు ప్రావిన్స్‌ 911, సౌదీలోని ఇతర ప్రాంతాలు 999, 996 కు కాల్ చేసి సమాచారం ఇవ్వాలి. ప్రజలు అందించే సమాచారాన్ని పూర్తిగా గోప్యంగా ఉంచుతామని, సమాచారం అందించిన వారికి ఎలాంటి బాధ్యత ఉండదని SFES స్పష్టం చేసింది.