హైదరాబాద్: సోషల్ మీడియాలో విపరీతంగా ట్రెండ్ అవుతున్న ‘1980s / Retro Photo Trend’ పట్ల అప్రమత్తంగా ఉండాలని హైదరాబాద్ సైబర్ క్రైమ్ పోలీసులు ప్రజలను హెచ్చరించారు. ట్రెండ్ పేరుతో వ్యక్తిగత ఫోటోలను ప్లాట్‌ఫామ్‌లలో పంచుకోవద్దని స్పష్టం చేశారు. వింతైన అప్లికేషన్లు లేదా తెలియని వెబ్‌సైట్లలో వ్యక్తిగత సమాచారాన్ని అప్‌లోడ్ చేయడం ద్వారా డిజిటల్ డేటా అభద్రతా గురవుతుందని పోలీసు అధికారులు ఓ ప్రకటనలో తెలిపారు.

ఎపికె ఫైల్స్ డౌన్‌లోడ్, ఏఐ మార్ఫింగ్ ప్రమాదాలు
ఈ ట్రెండ్ పేరుతో సోషల్ మీడియా, వాట్సాప్ గ్రూపుల ద్వారా ప్రచారమవుతున్న అనుమానాస్పద ఎపికె (APK) ఫైల్స్‌ను లేదా థర్డ్-పార్టీ యాప్‌లను ఎట్టి పరిస్థితుల్లోనూ డౌన్‌లోడ్ చేయవద్దని పోలీసులు హెచ్చరిస్తున్నారు. వీటిని ఇన్‌స్టాల్ చేయడం ద్వారా ఫోన్‌లోని వ్యక్తిగత ఫోటోలు, రహస్య డేటా హ్యాకర్ల చేతికి చిక్కే ప్రమాదం ఉందన్నారు. అంతేకాకుండా, మీరు అప్‌లోడ్ చేసే ఫోటోలను కృత్రిమ మేధ (AI) టూల్స్ ద్వారా మార్ఫింగ్ చేసి, నకిలీ ఫోటోలు లేదా వీడియోలుగా మార్చి భవిష్యత్తులో బ్లాక్‌మెయిల్‌కు పాల్పడే అవకాశముందని సైబర్ పోలీసులు ఆందోళన వ్యక్తం చేశారు.

బాధితులు వెంటనే 1930కు ఫిర్యాదు చేయాలి
వ్యక్తిగత భద్రతే మొదటి ప్రాధాన్యత అని, ట్రెండ్ల కంటే డిజిటల్ సేఫ్టీకి ప్రాధాన్యమివ్వాలని సూచించారు. ఇతరుల ఫోటోలను కూడా వారి అనుమతి లేకుండా సోషల్ మీడియాలో పోస్ట్ చేయకూడదని ఆదేశించారు. ఇప్పటికే ఏవైనా అనుమానాస్పద యాప్‌లను ఫోన్‌లో డౌన్‌లోడ్ చేసి ఉంటే వాటిని తక్షణమే అన్‌ఇన్‌స్టాల్ చేసి, డిజిటల్ బ్యాంకింగ్, సోషల్ మీడియా ఖాతాల భద్రతను తనిఖీ చేసుకోవాలని కోరారు. ఒకవేళ ఏమైనా సైబర్ మోసాలు జరిగితే వెంటనే 1930 టోల్ ఫ్రీ నంబర్‌కు కాల్ చేయాలని లేదా సమీపంలోని సైబర్ క్రైమ్ పోలీస్ స్టేషన్‌లో ఫిర్యాదు చేయాలని సూచించారు.