మనామా: బహ్రెయిన్‌లో రెండు కంపెనీ ప్రాంగణాల్లో చోరీలకు పాల్పడ్డారనే ఆరోపణలపై ఐదుగురు ఆసియా దేశాల పౌరులను పోలీసులు అరెస్టు చేశారు. అరెస్టయిన వారి వయసు 21 నుంచి 40 ఏళ్ల మధ్య ఉన్నట్లు దక్షిణ గవర్నరేట్ పోలీస్ డైరెక్టరేట్ వెల్లడించింది.
పోలీసుల వివరాల ప్రకారం.. రెండు వేర్వేరు కంపెనీ సైట్ల నుంచి విద్యుత్ కేబుళ్లు, ఎయిర్ కండిషనింగ్ యూనిట్ చోరీకి గురయ్యాయి. దొంగిలించిన వస్తువుల మొత్తం విలువ సుమారు BD14,000 వరకు ఉంటుందని తెలిపారు.

చోరీలకు సంబంధించి రెండు వేర్వేరు ఫిర్యాదులు అందడంతో పోలీసులు వెంటనే దర్యాప్తు చేపట్టారు. సమాచారం, ఆధారాలను సేకరించి నిందితులను గుర్తించే చర్యలు చేపట్టారు. దర్యాప్తులో ఐదుగురు అనుమానితులను గుర్తించిన పోలీసులు వారిని అదుపులోకి తీసుకున్నారు. ఈ కేసులో చట్టపరమైన చర్యలు ప్రారంభించామని, తదుపరి విచారణ కోసం కేసును పబ్లిక్ ప్రాసిక్యూషన్‌కు అప్పగించే ప్రక్రియ కొనసాగుతోందని దక్షిణ గవర్నరేట్ పోలీస్ డైరెక్టరేట్ తెలిపింది.