ఎమిరేట్స్ ఐడీ ఉన్నవారికి Dh5.. పర్యాటకులకు Dh10

అబుదాబి: ప్రపంచ ప్రసిద్ధి చెందిన అబుదాబిలోని షేక్ జాయెద్ గ్రాండ్ మసీద్ సందర్శకులకు కొత్త ప్రవేశ రుసుములను ప్రవేశపెట్టింది. యూఏఈ ఎమిరేట్స్ ఐడీ ఉన్నవారికి Dh5, విదేశీ పర్యాటకులకు Dh10 ప్రవేశ రుసుముగా నిర్ణయించారు.

అయితే 60 ఏళ్లు పైబడిన వారు, మూడేళ్లలోపు చిన్నారులు, అలాగే పీపుల్ ఆఫ్ డిటర్మినేషన్‌కు చెందిన సందర్శకులకు ఉచిత ప్రవేశం కొనసాగుతుంది.

సందర్శకులు ముందుగానే టికెట్ బుక్ చేసుకోవాలి. అధికారిక వెబ్‌సైట్ ద్వారా సందర్శనకు సంబంధించిన బుకింగ్ చేసుకోవచ్చు. సందర్శన తేదీకి గరిష్ఠంగా ఒక నెల ముందుగానే బుకింగ్ చేసుకునే అవకాశం ఉంటుంది.

సందర్శన సమయాలు

శనివారం నుంచి గురువారం వరకు ఉదయం 9 గంటల నుంచి రాత్రి 8:30 గంటల వరకు మసీదును సందర్శించవచ్చు.

శుక్రవారం ఉదయం 9 గంటల నుంచి 11:30 గంటల వరకు, అనంతరం మధ్యాహ్నం 2:30 గంటల నుంచి రాత్రి 8:30 గంటల వరకు సందర్శనకు అనుమతి ఉంటుంది.

‘దియా’ అనుభవం

మసీదుతో పాటు సందర్శకులకు పలు ప్రత్యేక అనుభవాలను కూడా అందుబాటులో ఉంచారు. అందులో ‘దియా’ (Diya) 360 డిగ్రీల ఇమ్మర్సివ్ అనుభవంగా ప్రత్యేక ఆకర్షణగా నిలుస్తోంది.

లైటింగ్, సౌండ్ టెక్నాలజీతో రూపొందించిన ఈ అనుభవం నక్షత్రాలతో నిండిన ఆకాశం నుంచి ప్రారంభమై యూఏఈ భూమి, దాని గొప్ప వారసత్వాన్ని పరిచయం చేస్తుంది. ‘దియా’కు ప్రవేశ రుసుము Dh25.

లైట్ అండ్ పీస్ మ్యూజియం

షేక్ జాయెద్ గ్రాండ్ మసీద్ సెంటర్‌లోని లైట్ అండ్ పీస్ మ్యూజియం కూడా సందర్శకులకు ప్రత్యేక అనుభూతిని అందిస్తోంది.

విశ్వాసం, స్ఫూర్తి, సహజీవనానికి సంబంధించిన కథనాలను ఈ మ్యూజియం పరిచయం చేస్తుంది. సెన్సరీ, ఇంటరాక్టివ్ అనుభవాలతో పాటు విలువైన కళాఖండాలు, సంప్రదాయాన్ని ఆధునిక సృజనాత్మకతతో మేళవించిన కళాకృతులు ఇక్కడ ప్రదర్శిస్తున్నారు.

మ్యూజియం ప్రవేశ రుసుము Dh25. మ్యూజియం, ‘దియా’ రెండింటినీ కలిపి సందర్శించేందుకు Dh40 పాస్ అందుబాటులో ఉంది.

ఆరు నెలల్లో 31 లక్షలకు పైగా సందర్శకులు

2026 తొలి ఆరు నెలల్లో షేక్ జాయెద్ గ్రాండ్ మసీద్ సెంటర్‌కు మొత్తం 3,127,607 మంది అతిథులు వచ్చినట్లు గణాంకాలు వెల్లడించాయి.

వారిలో 18,41,305 మంది ప్రార్థనలు, ఉపవాసాలకు వచ్చినవారు కాగా, వివిధ దేశాలకు చెందిన 12,41,808 మంది సందర్శకులు ఉన్నారు. సెంటర్‌లోని వినోదాత్మక వాకింగ్ ట్రాక్‌ను 44,494 మంది ఉపయోగించారు.

రంజాన్ 27వ రాత్రి ఒక్కరోజే మసీదుకు 53,902 మంది ప్రార్థనల కోసం వచ్చారు. వీరిలో 8,056 మంది తరావీహ్ ప్రార్థనలు, 45,846 మంది తహజ్జుద్ ప్రార్థనలు చేశారు.

భారత్ నుంచి అత్యధిక అంతర్జాతీయ సందర్శకులు

గణాంకాల ప్రకారం మసీదును సందర్శించిన వారిలో 78 శాతం మంది యూఏఈ వెలుపల నుంచి వచ్చినవారు.

ఖండాల వారీగా చూస్తే ఆసియా నుంచి 52 శాతం, యూరప్ నుంచి 31 శాతం, ఉత్తర అమెరికా నుంచి 10 శాతం మంది వచ్చారు. ఆఫ్రికా, దక్షిణ అమెరికా నుంచి చెరో 3 శాతం, ఆస్ట్రేలియా నుంచి 1 శాతం మంది సందర్శించారు.

దేశాల వారీగా భారత్ నుంచి వచ్చిన సందర్శకులు 21 శాతంతో మొదటి స్థానంలో ఉన్నారు. చైనా 10 శాతం, రష్యా 8 శాతం, అమెరికా 7 శాతం, జర్మనీ 4 శాతంగా ఉన్నాయి. ఫిలిప్పీన్స్, యూకే, ఫ్రాన్స్, పోలాండ్, పాకిస్థాన్ దేశాల నుంచి చెరో 3 శాతం మంది అంతర్జాతీయ సందర్శకులు వచ్చారు.

షేక్ జాయెద్ గ్రాండ్ మసీద్ ప్రత్యేకత

షేక్ జాయెద్ గ్రాండ్ మసీద్ సెంటర్‌ను 2008లో యూఏఈ ఉపాధ్యక్షుడు, డిప్యూటీ ప్రధానమంత్రి, ప్రెసిడెన్షియల్ కోర్ట్ చైర్మన్ షేక్ మన్సూర్ బిన్ జాయెద్ అల్ నహ్యాన్ జారీ చేసిన డిక్రీ ప్రకారం ఏర్పాటు చేశారు.

యూఏఈ వ్యవస్థాపకుడు దివంగత షేక్ జాయెద్ బిన్ సుల్తాన్ అల్ నహ్యాన్ సేవలు, వారసత్వాన్ని ప్రపంచానికి పరిచయం చేయడం సెంటర్ ప్రధాన లక్ష్యాల్లో ఒకటి. సహనం, సహజీవనం, పరస్పర గౌరవం వంటి విలువలను ప్రోత్సహించే అంతర్జాతీయ ఇస్లామిక్ సాంస్కృతిక కేంద్రంగా కూడా ఇది పనిచేస్తోంది.

షేక్ జాయెద్ కలలుగన్న ఈ మసీదు ఇస్లాం మతంలోని మితవాద, సహన విలువలను ప్రతిబింబించేలా నిర్మించబడింది. మసీదు నిర్మాణానికి సంబంధించిన ప్రాథమిక ఆలోచనలు 1980ల చివర్లో ప్రారంభమై, 1996 నవంబర్ 5న నిర్మాణ పనులు ప్రారంభమయ్యాయి.

ఈ మసీదు సుమారు 50,000 మంది వరకు సామర్థ్యం కలిగి ఉంది. అంతర్గత ప్రార్థనా మందిరాలు 2007లో ఈద్ అల్ అద్‌హా సందర్భంగా ప్రార్థనల కోసం ప్రారంభించబడ్డాయి.

అద్భుతమైన తెల్లటి మార్బుల్ నిర్మాణం, విశాలమైన ప్రాంగణం, సాంస్కృతిక అనుభవాలతో షేక్ జాయెద్ గ్రాండ్ మసీద్ అబుదాబి పర్యాటక ఆకర్షణల్లో ఒకటిగా కొనసాగుతోంది.