దుబాయ్: దుబాయ్ రోడ్స్ అండ్ ట్రాన్స్‌పోర్ట్ అథారిటీ (RTA) చేపట్టిన ఔద్ మైథా రోడ్, అల్ అసాయెల్ స్ట్రీట్ అభివృద్ధి ప్రాజెక్టు పనులన్నీ పూర్తయ్యాయి. దుబాయ్ రహదారి నెట్‌వర్క్ అనుసంధానాన్ని మరింత బలోపేతం చేయడం, ప్రధాన ట్రాఫిక్ మార్గాల మధ్య కనెక్టివిటీని మెరుగుపరచడం, వేగంగా పెరుగుతున్న జనాభా, పట్టణీకరణకు అనుగుణంగా రవాణా మౌలిక వసతులను అభివృద్ధి చేయడం ఈ ప్రాజెక్టు ప్రధాన లక్ష్యాలు.

ఈ ప్రాజెక్టులో నాలుగు కీలక జంక్షన్ల అభివృద్ధి, మొత్తం 4.3 కిలోమీటర్ల పొడవైన నాలుగు వంతెనలు, రెండు టన్నెళ్లు, అలాగే 14 కిలోమీటర్ల రహదారుల అభివృద్ధి చేపట్టారు. దీంతో ట్రాఫిక్ ప్రవాహం మెరుగుపడటంతో పాటు రహదారుల సామర్థ్యం పెరిగి, ప్రయాణ సమయం గణనీయంగా తగ్గనుంది.

50 శాతం పెరిగిన రహదారి సామర్థ్యం

RTA డైరెక్టర్ జనరల్, ఎగ్జిక్యూటివ్ డైరెక్టర్స్ బోర్డు చైర్మన్ మత్తర్ అల్ తాయర్ మాట్లాడుతూ, దుబాయ్ రోడ్లు, రవాణా మౌలిక వసతులను సమగ్రంగా అభివృద్ధి చేసే ప్రణాళికలో ఈ ప్రాజెక్టు కీలక భాగమని తెలిపారు.

ఊద్ మైథా స్ట్రీట్ సామర్థ్యం ఇరువైపులా కలిపి గంటకు 10,400 వాహనాల నుంచి 15,600 వాహనాలకు పెరిగిందని, అంటే సుమారు 50 శాతం వృద్ధి సాధించినట్లు వెల్లడించారు.

అదే సమయంలో ప్రయాణ సమయం 20 నిమిషాల నుంచి కేవలం 5 నిమిషాలకు తగ్గిందని, దీంతో ప్రయాణికులకు సుమారు 75 శాతం సమయం ఆదా అవుతుందని తెలిపారు.

4 ప్రధాన జంక్షన్ల అభివృద్ధి

ఈ ప్రాజెక్టు ద్వారా జాబీల్, అల్ జద్దాఫ్, ఔద్ మైథా, ఉమ్ హురైర్ ప్రాంతాలకు రహదారి కనెక్టివిటీ మెరుగుపడింది. అలాగే లతీఫా హాస్పిటల్, అల్ వస్ల్ క్లబ్ వంటి ముఖ్యమైన సదుపాయాలకు రాకపోకలు సులభతరం కానున్నాయి.

2030 నాటికి ఈ ప్రాజెక్టు పరిధిలోని ప్రాంతాల్లో నివసించే జనాభా 4.20 లక్షలకు పైగా చేరుకునే అవకాశం ఉన్న నేపథ్యంలో రవాణా అవసరాలను దృష్టిలో ఉంచుకుని ప్రాజెక్టును చేపట్టినట్లు RTA తెలిపింది.

షేక్ రషీద్ రోడ్ జంక్షన్‌లో మార్పులు

ఊద్ మైథా రోడ్–షేక్ రషీద్ రోడ్ జంక్షన్ వద్ద ఎడమ మలుపు ర్యాంప్‌కు అదనపు లేన్ ఏర్పాటు చేశారు. దీంతో అల్ గర్హౌద్ బ్రిడ్జ్ వైపు వెళ్లే వాహనాల సామర్థ్యం గంటకు 1,800 వాహనాలకు పెరిగింది.

షేక్ రషీద్ రోడ్‌లో ఉన్న సర్వీస్ రోడ్డును కూడా అభివృద్ధి చేసి ట్రాఫిక్ ఓవర్ల్యాప్‌లను తగ్గించారు. షేక్ రషీద్ రోడ్ నుంచి ఊద్ మైథా రోడ్ మీదుగా దుబాయ్–అల్ ఐన్ రోడ్ వైపు వెళ్లే కుడి మలుపు లేన్లను రెండింటి నుంచి మూడుకు పెంచారు. దీంతో ఈ మార్గ సామర్థ్యం గంటకు 4,000 వాహనాలకు చేరింది.

బర్ దుబాయ్ వైపు వెళ్లే వాహనాల కోసం ఊద్ మైథా రోడ్ సర్వీస్ రోడ్డును షేక్ రషీద్ రోడ్ జంక్షన్‌తో అనుసంధానించే టన్నెల్‌ను కూడా నిర్మించారు.

అల్ అసాయెల్ స్ట్రీట్ వద్ద బ్రిడ్జిలు 

ఔద్ మైథా రోడ్–అల్ అసాయెల్ స్ట్రీట్–అల్ వస్ల్ క్లబ్ స్ట్రీట్ జంక్షన్‌ను కూడా విస్తృతంగా అభివృద్ధి చేశారు.

అల్ అసాయెల్ స్ట్రీట్‌ను అల్ వస్ల్ క్లబ్ స్ట్రీట్ మీదుగా అల్ ఖైల్ రోడ్‌తో అనుసంధానించేందుకు రెండు వంతెనలు నిర్మించారు. రెండు లేన్ల మొదటి వంతెన గంటకు 2,400 వాహనాల సామర్థ్యంతో, అల్ అసాయెల్ స్ట్రీట్ నుంచి అల్ వస్ల్ క్లబ్ స్ట్రీట్ వైపు వెళ్లే ట్రాఫిక్‌కు సేవలందిస్తుంది.

మూడు లేన్ల రెండో వంతెన గంటకు 3,600 వాహనాల సామర్థ్యంతో అల్ ఖైల్ రోడ్ నుంచి అల్ అసాయెల్ స్ట్రీట్ వైపు వెళ్లే వాహనాలకు ఉపయోగపడుతుంది.

అదనంగా, అల్ అసాయెల్ స్ట్రీట్ నుంచి ఔద్ మైథా రోడ్ వైపు ఎడమ మలుపు ట్రాఫిక్ కోసం రెండు లేన్ల వంతెనను నిర్మించారు. దీని సామర్థ్యం గంటకు 2,400 వాహనాలు.

అల్ ఖైల్ రోడ్, జాబీల్ ప్యాలెస్ స్ట్రీట్ వద్ద కూడా అభివృద్ధి

అల్ వస్ల్ క్లబ్ స్ట్రీట్–అల్ ఖైల్ రోడ్ జంక్షన్ వద్ద రెండు లేన్ల బ్రిడ్జి నిర్మించారు. ఇది బిజినెస్ బే క్రాసింగ్ వైపు అల్ ఖైల్ రోడ్‌కు వెళ్లే ట్రాఫిక్‌కు సేవలందిస్తుంది. దీని సామర్థ్యం గంటకు 3,000 వాహనాలు.

అల్ వస్ల్ క్లబ్ స్ట్రీట్‌లో అల్ ఖైల్ రోడ్ వైపు వెళ్లే ఎగ్జిట్‌ను రెండు లేన్లకు విస్తరించడంతో పాటు రెండు దిశల్లో సర్వీస్ రోడ్లు, పార్కింగ్ స్థలాలను ఏర్పాటు చేశారు.

జాబీల్ ప్యాలెస్ స్ట్రీట్–అల్ ఖైల్ రోడ్–ఔద్ మైథా రోడ్ జంక్షన్ వద్ద అల్ ఖైల్ రోడ్ నుంచి దుబాయ్–అల్ ఐన్ రోడ్ వైపు వెళ్లే ఎడమ మలుపు ర్యాంప్‌కు మరో లేన్‌ను జోడించారు. దీంతో సామర్థ్యం గంటకు 900 నుంచి 1,800 వాహనాలకు పెరిగింది.

అదే ప్రాంతంలో దుబాయ్–అల్ ఐన్ రోడ్ నుంచి ఔద్ మైథా రోడ్ సర్వీస్ రోడ్ వైపు వెళ్లే ట్రాఫిక్ కోసం గంటకు 1,200 వాహనాల సామర్థ్యంతో సింగిల్ లేన్ టన్నెల్ నిర్మించారు.

అల్ ఖైల్ రోడ్ నుంచి ఔద్ మైథా రోడ్ వైపు వెళ్లే వంతెన లేన్ల సంఖ్యను రెండింటి నుంచి మూడుకు పెంచారు. దీంతో ఈ వంతెన సామర్థ్యం గంటకు 2,200 నుంచి 3,300 వాహనాలకు పెరిగింది.

ఈ సమగ్ర అభివృద్ధి ద్వారా దుబాయ్‌లోని కీలక ప్రాంతాలు, ప్రధాన రహదారులు, నివాస మరియు అభివృద్ధి ప్రాంతాల మధ్య కనెక్టివిటీ మరింత మెరుగుపడటంతో పాటు భవిష్యత్ ట్రాఫిక్ అవసరాలను సమర్థవంతంగా ఎదుర్కొనే రవాణా మౌలిక వసతులు అందుబాటులోకి వచ్చాయి.