దుబాయ్: ఆరోగ్యకరమైన జీవనశైలి, స్నేహభావం, భారత్–యూఏఈ మధ్య ద్వైపాక్షిక సంబంధాలను మరింత బలోపేతం చేసే లక్ష్యంతో దుబాయ్‌లోని కైట్ బీచ్, జుమేరాలో 5 కిలోమీటర్ల ఫిట్‌నెస్ రన్ నిర్వహించారు.

ఈ కార్యక్రమంలో దుబాయ్‌లోని భారత కాన్సుల్ జనరల్ డాక్టర్ ఈ. విష్ణువర్ధన్ రెడ్డితో పాటు యూఏఈ ఆర్థిక, పర్యాటక శాఖ మంత్రి హెచ్.ఈ. అబ్దుల్లా బిన్ తౌక్ అల్ మర్రి పాల్గొన్నారు.

దుబాయ్ ఫిట్‌నెస్ ఛాలెంజ్ 30x30లో భాగంగా భారత కాన్సులేట్ జనరల్, యూఏఈ ఆర్థిక, పర్యాటక మంత్రిత్వ శాఖ సంయుక్తంగా ఈ కార్యక్రమాన్ని నిర్వహించాయి.

ఇండియన్ బిజినెస్ అండ్ ప్రొఫెషనల్ కౌన్సిల్ (IBPC), యూఏఈ–ఇండియా బిజినెస్ కౌన్సిల్, యంగ్ ప్రెసిడెంట్స్ ఆర్గనైజేషన్ (YPO)కు చెందిన 60 మందికి పైగా ప్రముఖ భారతీయ వ్యాపారవేత్తలు, పారిశ్రామికవేత్తలు ఈ ఫిట్‌నెస్ రన్‌లో పాల్గొన్నారు. ఆరోగ్యం, ఐక్యత, పరస్పర స్నేహభావానికి ఈ కార్యక్రమం ప్రాధాన్యతనిచ్చింది.

భారతీయ వ్యాపార ప్రముఖులతో కలిసి యూఏఈ మంత్రి హెచ్.ఈ. అబ్దుల్లా బిన్ తౌక్ అల్ మర్రి తొలిసారిగా ఫిట్‌నెస్ రన్‌లో పాల్గొనడం ఈ కార్యక్రమానికి ప్రత్యేక ఆకర్షణగా నిలిచింది.

ఈ సందర్భంగా మంత్రి పాల్గొనడంపై భారత కాన్సుల్ జనరల్ డాక్టర్ ఈ. విష్ణువర్ధన్ రెడ్డి కృతజ్ఞతలు తెలిపారు. భారత ప్రవాసులు ప్రతిరోజూ తమ జీవితాల్లో వ్యాయామం, శారీరక శ్రమకు ప్రాధాన్యత ఇవ్వాలని ఆయన పిలుపునిచ్చారు.

ఈ ఫిట్‌నెస్ రన్ ఆరోగ్యకరమైన జీవనశైలిని ప్రోత్సహించడమే కాకుండా, భారత్–యూఏఈ ప్రజల మధ్య పరస్పర సంబంధాలు, స్నేహబంధాన్ని మరింత బలోపేతం చేయడానికి దోహదపడింది.