అమెరికా: ఇరాన్‌తో సైనిక ఉద్రిక్తతలు కొనసాగుతున్న నేపథ్యంలో అమెరికా ఆ దేశంపై ఆర్థిక ఆంక్షల పాశాన్ని మరింత బిగించింది. ప్రపంచ వ్యాప్తంగా ఉన్న ఇరానియన్ ఎయిర్‌లైన్స్ సర్వీసులను పూర్తిగా నిలిపివేసేలా చర్యలు తీసుకుంటున్నామని యూఎస్ ట్రెజరీ సెక్రటరీ స్కాట్ బెసెంట్ పటిష్ట హెచ్చరిక చేశారు. ఇరాన్‌కు చెందిన ఏ విమానానికైనా విదేశీ విమానాశ్రయాల్లో ల్యాండింగ్ అనుమతులు, ఇంధనం (ఫ్యూయెల్) సరఫరా చేయడం లేదా టికెట్ల విక్రయాలు వంటి సేవలు అందిస్తే కఠినమైన ‘సెకండరీ శాంక్షన్స్’ ఎదుర్కోవాల్సి వస్తుందని స్పష్టం చేశారు. అమెరికా హెచ్చరికలను దిక్కరించి ఇరాన్ విమానాలకు సహకరించే ఏ విదేశీ సంస్థనైనా, దేశాన్నైనా అంతర్జాతీయ బ్యాంకింగ్ లావాదేవీల కీలక మూలమైన ‘డాలర్ సిస్టమ్’ (US Dollar System) నుంచి పూర్తిగా తొలగిస్తామని ఆయన గట్టిగా తేల్చి చెప్పారు.

ఆర్థికంగా ఇరాన్‌ను నిర్బంధించే వ్యూహం: ఇంధన, రవాణా వ్యవస్థలపై డేగకన్ను

ఇరాన్ ప్రభుత్వం తన మిలిటరీ బలగాలను, ఆయుధాలను అలాగే అక్రమ రవాణాను పౌర విమానయాన రంగం ద్వారా సాగిస్తోందని అమెరికా ట్రెజరీ డిపార్ట్‌మెంట్ ప్రధానంగా ఆరోపిస్తోంది. అందుకే ఇరాన్‌కు చెందిన ప్రధాన ఎయిర్‌లైన్స్‌ను లక్ష్యంగా చేసుకుని గ్లోబల్ కనెక్షన్‌ను కట్ చేసేలా అమెరికా ఆర్థిక దిగ్బంధనానికి తెరలేపింది. ఇతర దేశాలు అమెరికాతో ఆర్థిక సంబంధాలు కోల్పోకూడదనుకుంటే ఇరాన్ విమానయాన రంగానికి ఏ రకమైన సేవలూ అందించకూడదని బెసెంట్ ఉద్ఘాటించారు. అంతర్జాతీయ వ్యాపార వర్గాలు, ఎయిర్‌పోర్ట్ అథారిటీలు అమెరికా నిబంధనలకు కట్టుబడి ఉండక తప్పని పరిస్థితిని కల్పిస్తూ ఇరాన్‌ను ఆర్థికంగా, రవాణా పరంగా కోలుకోలేని దెబ్బతీసేందుకు వాషింగ్టన్ తన వ్యూహాన్ని మరింత వేగవంతం చేసింది.