దుబాయ్‌: యూఏఈలో పాఠశాలలు తిరిగి ప్రారంభమైన నేపథ్యంలో పిల్లల్లో ఫ్లూ, శ్వాసకోశ ఇన్ఫెక్షన్లు పెరుగుతున్నాయని వైద్యులు, పాఠశాలలు తల్లిదండ్రులను అప్రమత్తం చేస్తున్నాయి. పిల్లల్లో ఫ్లూ లక్షణాలు కనిపిస్తే ఇంట్లోనే ఉంచాలని, ఇతర పిల్లలకు దూరంగా ఉంచాలని సూచిస్తున్నారు. కొన్ని పాఠశాలల్లో వివిధ తరగతుల్లో ఇన్‌ఫ్లుయెంజా కేసులు నమోదైనట్లు తల్లిదండ్రులకు పంపిన సందేశాల్లో పేర్కొన్నారు.

ఈ లక్షణాలు ఉంటే జాగ్రత్త

పిల్లల్లో కింది లక్షణాలను తల్లిదండ్రులు గమనించాలని పాఠశాలలు సూచిస్తున్నాయి:

* జ్వరం

* దగ్గు

* గొంతు నొప్పి

* ముక్కు కారడం లేదా ముక్కు మూసుకుపోవడం

* శరీర నొప్పులు

* నీరసం, అలసట

* కొంతమంది పిల్లల్లో వాంతులు లేదా విరేచనాలు

ఫ్లూ లక్షణాలు ఉన్న పిల్లలను జ్వరం తగ్గించే మందులు ఉపయోగించకుండా కనీసం 24 గంటల పాటు జ్వరం లేకపోయే వరకు స్కూల్‌కు పంపవద్దని సూచిస్తున్నారు.

7–10 రోజులపాటు ఫ్లూ లక్షణాలు

ముబాదలా హెల్త్‌ దుబాయ్‌ స్పెషలిస్ట్‌ పీడియాట్రిషియన్‌ డాక్టర్‌ బాసెమ్‌ షమ్స్‌ఎద్దీన్‌ మాట్లాడుతూ.. స్కూల్స్‌ తిరిగి ప్రారంభమైన సమయంలో పిల్లల్లో శ్వాసకోశ ఇన్ఫెక్షన్లు పెరగడం సాధారణమని తెలిపారు. ఈ ఏడాది ఇప్పటికే ఇన్‌ఫ్లుయెంజా A కేసుల ప్రారంభ పెరుగుదల కనిపిస్తోందని చెప్పారు.

ఫ్లూ ప్రధాన లక్షణాల్లో అధిక జ్వరం, ముక్కు దిబ్బడ, దగ్గు, గొంతు నొప్పి ఉంటాయని తెలిపారు. పిల్లల్లో అలసట, శరీర నొప్పులు, తలనొప్పి, ఆకలి తగ్గడం కూడా కనిపించవచ్చన్నారు. సాధారణంగా అనారోగ్యం 7–10 రోజుల వరకు కొనసాగవచ్చని, అయితే దగ్గు, అలసట మరికొంత కాలం ఉండే అవకాశం ఉందని వివరించారు.

నిర్ధారిత లేదా ఫ్లూ ఉన్నట్లు బలమైన అనుమానం ఉన్న పిల్లలకు కొన్ని సందర్భాల్లో యాంటీవైరల్‌ మందులు అనారోగ్య వ్యవధిని, తీవ్రతను తగ్గించవచ్చని తెలిపారు. ముఖ్యంగా ఆస్తమా వంటి శ్వాసకోశ సమస్యలు ఉన్న పిల్లలకు చికిత్స విషయంలో పిల్లల వైద్యుడిని సంప్రదించాలని సూచించారు.

24 గంటల రూల్ ఎందుకు?

NMC రాయల్‌ హాస్పిటల్‌ అబుదాబి పీడియాట్రిక్‌ విభాగాధిపతి, కన్సల్టెంట్‌ పీడియాట్రిషియన్‌ డాక్టర్‌ సమేహ్‌ అబ్దెల్‌అజీమ్‌ మొహమ్మద్‌ మాట్లాడుతూ.. కొన్ని లక్షణాలు తగ్గినప్పటికీ పిల్లల నుంచి వైరస్‌ ఇతరులకు వ్యాపించే అవకాశం ఉంటుందని తెలిపారు. దగ్గు, తుమ్ముల ద్వారా వెలువడే శ్వాసకోశ బిందువులు లేదా ప్రత్యక్ష సంపర్కం ద్వారా వైరస్‌ సహచర విద్యార్థులకు వ్యాపించవచ్చన్నారు. పెద్దలతో పోలిస్తే పిల్లలు అనారోగ్యం ప్రారంభమైన తర్వాత కూడా కొన్ని రోజుల పాటు వైరస్‌ను వ్యాప్తి చేసే అవకాశం ఉందని వివరించారు. అందుకే జ్వరం తగ్గి 24 గంటలు పూర్తయ్యే వరకు స్కూల్‌కు పంపకపోవడం ఇతర పిల్లలకు ఇన్ఫెక్షన్‌ వ్యాప్తిని తగ్గించడంలో కీలకమని వైద్యులు సూచిస్తున్నారు.

 ఫ్లూ వ్యాక్సిన్‌ తీసుకోవాలి

పిల్లల ఆరోగ్యానికి సమతుల్యమైన ఆహారం, తగినంత నీరు తీసుకోవడం కూడా ముఖ్యమని వైద్యులు తెలిపారు. సీజనల్‌ ఇన్‌ఫ్లుయెంజా వ్యాక్సిన్‌ను ప్రతి సంవత్సరం తీసుకోవడం పిల్లలను ఫ్లూ నుంచి రక్షించడానికి ప్రభావవంతమైన మార్గాల్లో ఒకటని డాక్టర్‌ సమేహ్‌ తెలిపారు.

మెడ్‌కేర్‌ షేక్‌ సఖర్‌ అల్‌ ఖాసిమీ హాస్పిటల్‌ స్పెషలిస్ట్‌ ఇంటర్నల్‌ మెడిసిన్‌ డాక్టర్‌ జదీర్‌ అక్కపరంబిల్‌ మాట్లాడుతూ.. చిన్న పిల్లలు, వృద్ధులు, గర్భిణులు, ఆస్తమా, డయాబెటిక్, గుండె లేదా ఊపిరితిత్తుల సమస్యలు ఉన్నవారికి వ్యాక్సినేషన్‌ ప్రత్యేకంగా ముఖ్యమని తెలిపారు. అయితే వ్యక్తిగత పరిస్థితులకు అనుగుణంగా సూచనలు మారవచ్చని, స్థానిక ఆరోగ్య మార్గదర్శకాలను పాటించాలని చెప్పారు.

ఇంట్లోనూ జాగ్రత్తలు అవసరం

పిల్లలకు చిన్నప్పటి నుంచే చేతులు తరచుగా కడుక్కోవడం, దగ్గినప్పుడు లేదా తుమ్మినప్పుడు నోరు, ముక్కును కప్పుకోవడం వంటి పరిశుభ్రత అలవాట్లు నేర్పించాలని వైద్యులు సూచించారు. ఇంట్లో ఒక పిల్లవాడు అనారోగ్యానికి గురైతే సాధ్యమైనంత వరకు ఇతర పిల్లల నుంచి వేరు ఉంచడం, టవల్స్‌, గ్లాసులు, ఇతర పాత్రలను పంచుకోకుండా చూడడం ద్వారా కుటుంబంలో వైరస్‌ వ్యాప్తిని తగ్గించవచ్చని తెలిపారు.

పిల్లలకు అధిక జ్వరం, శ్వాస తీసుకోవడంలో ఇబ్బంది, తినడం లేదా తాగడం మానేయడం, అసాధారణంగా తీవ్రమైన అలసట వంటి లక్షణాలు కనిపిస్తే వైద్య సలహా తీసుకోవాలని సూచించారు.