ఆసియాకి చెందిన ఓ వ్యాపారవేత్తని ఇంటర్‌పోల్‌ 'మోస్ట్‌ వాంటెడ్‌'గా గుర్తించింది. అయితే దుబాయ్‌ పోలీసుల నుంచి ఆయనకు అద్భుతమైన అవకాశం లభించింది. యూఏఈలో ఆయన గతంలో చెల్లించాల్సిన చెల్లింపుల్ని క్లియర్‌ చేసేందుకు అవకాశం కల్పించారు. 2009లో న్యాయస్థానం, ఆయనకు నోటీసులు జారీ చేసింది. ఆయన కంపెనీ 200,000 దిర్హామ్‌ల మొత్తం బ్యాంకులకు చెల్లించవలసి ఉంది. రెసిషన్‌ కారణంగా ఆర్థిక ఇబ్బందుల్లో కూరుకుపోయింది ఆ సంస్థ. అయితే స్వదేశానికి పారిపోయిన ఆ వ్యక్తి కుటుంబం, తమకు అవకాశం కల్పిస్తే ఆ లోన్లు అన్నీ క్లియర్‌ చేస్తామని దుబాయ్‌ పోలీసులకు విజ్ఞప్తి చేసింది. ఆ విజ్ఞప్తిని పరిశీలించిన దుబాయ్‌ పోలీసులు, దుబాయ్‌కి ఆయన వచ్చేందుకు అనుమతిచ్చారు. అలాగే, సదరు వ్యాపారవేత్త తమ కంపెనీని నష్టాల్లో ముంచేసిన మేనేజర్‌పై పోలీసులకు పిర్యాదు చేయాలనుకుంటున్నట్లు దుబాయ్‌ పోలీస్‌ వాంటెడ్‌ సెక్షన్‌ డైరెక్టర్‌ కల్నల్‌ సయీద్‌ అల్‌ అయిల్‌ చెప్పారు.