శాన్‌ఫ్రాన్సిస్కో: ఆర్టిఫిషియల్‌ ఇంటెలిజెన్స్‌ సంస్థ ఓపెన్‌ఏఐకి చెందిన ఏఐ టూల్స్‌.. చాట్‌జీపీటీ యూజర్ల ఫోటోలను సంస్థకు తెలియకుండానే ఆన్‌లైన్‌ సైట్లలో పోస్టు చేసినట్లు కంపెనీ వెల్లడించింది. ఏఐ ఏజెంట్లు తమకు నిర్దేశించిన పరిమితులను దాటి స్వయంప్రతిపత్తితో పనిచేస్తున్న ఘటనల్లో ఇది తాజా ఉదాహరణగా నిలిచింది.

అమెరికా ఫెడరల్‌ ప్రభుత్వ సంస్థలకు చెందిన వెబ్‌సైట్లను కూడా తమ టూల్స్‌ యాక్సెస్‌ చేసినట్లు వచ్చిన న్యూయార్క్‌ టైమ్స్‌ కథనాన్ని ఓపెన్‌ఏఐ ధృవీకరించింది. అయితే, ఆయా వెబ్‌సైట్లలో బహిరంగంగా అందుబాటులో ఉన్న సమాచారాన్ని మాత్రమే తమ టూల్స్‌ సేకరించాయని సంస్థ స్పష్టం చేసింది.

53 ఫోటోలు థర్డ్‌ పార్టీ సైట్లలోకి

ఓపెన్‌ఏఐ ప్రకారం.. మొత్తం 53 ఫోటోలు అనుకోకుండా ఇమేజ్‌-హోస్టింగ్‌ సైట్లలో పోస్టయ్యాయి. వాటికి సంబంధించిన లింకులు బహిరంగంగా జాబితా చేయబడలేదు. సంబంధిత హోస్టింగ్‌ సంస్థల సహకారంతో చాలా ఫోటోలను ఇప్పటికే తొలగించినట్లు ఓపెన్‌ఏఐ తెలిపింది. మిగిలిన చిత్రాలను తొలగించే ప్రక్రియ కొనసాగుతోందని పేర్కొంది.

తమ రీసెర్చ్‌ ఎన్విరాన్‌మెంట్‌లో పనిచేసిన ఏఐ ఏజెంట్లు.. శిక్షణ, ఇవాల్యుయేషన్ డేటాను పంపకూడని థర్డ్‌ పార్టీ సేవలకు పంపినట్లు వివరాలను వెల్లడించినట్లు ఓపెన్‌ఏఐ తన X పోస్టులో తెలిపింది.

యూజర్ల అనుమతితో సేకరించిన డేటా

ఈ ఫోటోలు తమ మోడళ్లను మెరుగుపరిచేందుకు డేటా వినియోగానికి అనుమతించిన యూజర్ల ఖాతాల నుంచి వచ్చినవని కంపెనీ తెలిపింది. వాటిని ఉపయోగించే ముందు ప్రైవసీ ఫిల్టర్‌ ద్వారా ప్రాసెస్‌ చేసినట్లు, ఆ తర్వాత వాటిని అసలు యూజర్లతో అనుసంధానం చేయడం సాధ్యం కాదని పేర్కొంది.

అయితే ఆ చిత్రాల్లో వ్యక్తులను గుర్తించే అవకాశం ఉందా? లేదా సున్నితమైన సమాచారం ఉందా? అనే విషయంపై ఓపెన్‌ఏఐ స్పష్టత ఇవ్వలేదు.

‘రోగ్‌’ ఏఐ ఏజెంట్లపై దర్యాప్తు

తమ పరిశోధనల్లో ఉపయోగించే ఏఐ ఏజెంట్లు శిక్షణ డేటాను బాహ్య ప్లాట్‌ఫారమ్‌లకు పంపినట్లు ఓపెన్‌ఏఐ తెలిపింది. ఆగస్టులో తమ రీసెర్చ్‌ ఎన్విరాన్‌మెంట్‌ భద్రతా ప్రోటోకాల్స్‌ను మరింత కట్టుదిట్టం చేయడానికి ముందే ఈ ఘటనలు చోటుచేసుకున్నట్లు పేర్కొంది.

గతంలో ఏఐ ఏజెంట్లు చేసిన కార్యకలాపాలను కూడా కంపెనీ పరిశీలిస్తోంది. ఈ సమీక్ష పూర్తవడానికి నెలల సమయం పట్టొచ్చని ఓపెన్‌ఏఐ తెలిపింది. తాము ఇప్పటివరకు పరిశీలించిన కార్యకలాపాల్లో ఎక్కువ భాగం ప్రశ్నలకు సమాధానాలు ఇవ్వడానికి పబ్లిక్‌ వెబ్‌ కంటెంట్‌ను యాక్సెస్‌ చేయడం వంటి సాధారణ పరిశోధనా పనులేనని సంస్థ ప్రతినిధి తెలిపారు. ప్రభుత్వ వెబ్‌సైట్లను కూడా ఏఐ మోడళ్లు విశ్వసనీయమైన పబ్లిక్‌ సమాచార వనరులుగా భావించి యాక్సెస్‌ చేసినట్లు వివరించారు.

ఆలస్యంపై సామ్‌ ఆల్ట్‌మన్‌ స్పందన

ఓపెన్‌ఏఐ సీఈఓ సామ్‌ ఆల్ట్‌మన్‌ శుక్రవారం Xలో స్పందిస్తూ.. ఈ ఘటనలను సమీక్షించి, వాటి వివరాలను వెల్లడించడంలో తాము కోరుకున్నంత వేగంగా వ్యవహరించలేకపోయామని అంగీకరించారు. అయితే, పారదర్శకతను పాటించాలన్న తమ ప్రయత్నంతో పాటు, విశ్లేషించాల్సిన భారీ స్థాయి డేటాను సమగ్రంగా పరిశీలించాల్సిన అవసరం ఉందని ఆయన పేర్కొన్నారు.

హగింగ్‌ ఫేస్‌ ఘటన అత్యంత తీవ్రమైనదే

జూలై 21న ఓపెన్‌ఏఐ వెల్లడించిన మరో ఘటనలో.. ఆ నెలలో నిర్వహించిన పరీక్షల సమయంలో రెండు ఏఐ మోడళ్లు తమ నియంత్రిత వాతావరణం నుంచి బయటకు వచ్చి స్వయంగా ఇంటర్నెట్‌ను యాక్సెస్‌ చేశాయి. అనంతరం ఏఐ సాఫ్ట్‌వేర్‌కు సంబంధించిన ఆన్‌లైన్‌ లైబ్రరీ అయిన హగింగ్‌ ఫేస్‌ అంతర్గత వ్యవస్థల్లోకి ప్రవేశించాయి.

ఈ ఘటన ఏఐ సంస్థలు తమ సొంత మోడళ్లను పూర్తిగా నియంత్రించగలుగుతున్నాయా అనే అంశంపై ఆందోళనలకు దారితీసింది. శుక్రవారం కూడా ఆల్ట్‌మన్‌.. హగింగ్‌ ఫేస్‌ ఘటననే ఇప్పటివరకు తమకు ఎదురైన అత్యంత తీవ్రమైన ఘటనగా పేర్కొన్నారు. తర్వాత ఓపెన్‌ఏఐతో పాటు ఆంత్రోపిక్‌, మెటా వంటి ఇతర సంస్థల్లోనూ ఇలాంటి ఏఐ ఏజెంట్‌ ఘటనలు వెలుగులోకి వచ్చాయి.

ఇదిలా ఉండగా, బుధవారం న్యూయార్క్‌లో ఆస్ట్రేలియా ప్రధాని ఆంథోనీ అల్బనీస్‌ మాట్లాడుతూ.. జూన్‌లో ఓపెన్‌ఏఐకి చెందిన ఒక ఏజెంట్‌ ఆస్ట్రేలియా ప్రభుత్వ ఆరోగ్య పోర్టల్‌ను అనధికారికంగా యాక్సెస్‌ చేసినట్లు తెలిపారు. ఈ విషయాన్ని అధికారులకు తెలియజేయడంలో ఓపెన్‌ఏఐ ఆలస్యం చేసిందని ఆయన విమర్శించారు.