దోహా: ప్రైవేట్‌ రంగంలో ఖతారీ పౌరులకు మరిన్ని ఉద్యోగ అవకాశాలు కల్పించే లక్ష్యంతో రూపొందించిన ప్రైవేట్ సెక్టర్ జాతీయీకరణ ప్లాన్ (Private Sector Nationalisation Plan) అమలుపై ఖతార్‌ కార్మిక మంత్రిత్వ శాఖ సంప్రదింపులను ప్రారంభించింది. కార్మిక శాఖ మంత్రి డాక్టర్‌ అలీ బిన్‌ స్మైఖ్‌ అల్‌ మర్రీ అధ్యక్షతన తొలి సమావేశం జరిగింది. ఈ సమావేశానికి ప్రభుత్వ యాజమాన్యంలోని కంపెనీలు, ప్రజా ప్రయోజన సంస్థలకు చెందిన పలువురు చీఫ్‌ ఎగ్జిక్యూటివ్‌ అధికారులు, సీనియర్‌ మేనేజ్‌మెంట్‌ ప్రతినిధులు హాజరయ్యారు.

ప్రైవేట్‌ రంగ జాతీయీకరణ చట్టాన్ని సమర్థవంతంగా అమలు చేయడానికి అవసరమైన విధానాలను గుర్తించడం, ప్రైవేట్‌ రంగం ఎదుర్కొంటున్న సవాళ్లను తెలుసుకోవడం, కంపెనీల అభిప్రాయాలు, సూచనలను స్వీకరించడం ఈ సంప్రదింపుల ప్రధాన ఉద్దేశమని మంత్రిత్వ శాఖ తెలిపింది.

ప్రైవేట్‌ కంపెనీలు, సంస్థలతో భాగస్వామ్యం, సహకారాన్ని మరింత బలోపేతం చేయడానికి మంత్రిత్వ శాఖ కట్టుబడి ఉందని మంత్రి తెలిపారు. జాతీయీకరణ చట్టం లక్ష్యాలను సమర్థవంతంగా సాధించేందుకు కంపెనీల అభిప్రాయాలను పరిగణనలోకి తీసుకోవడం, వారు ఎదుర్కొనే సమస్యలను గుర్తించి తగిన పరిష్కారాలను రూపొందించడం ముఖ్యమని ఆయన పేర్కొన్నారు.

ఖతారీలకు మరిన్ని ఉద్యోగాలు

జాతీయీకరణ ప్రణాళిక ద్వారా ప్రైవేట్‌ రంగంలో ఖతారీ పౌరుల ఉపాధిని పెంచేందుకు సమగ్ర కార్యాచరణ విధానం రూపొందిస్తున్నట్లు మంత్రి తెలిపారు. ఇందులో స్పష్టమైన లక్ష్యాలు, సమర్థవంతమైన ప్రోత్సాహకాలు, ప్రైవేట్‌ రంగంతో బలమైన భాగస్వామ్యం, నిరంతర పర్యవేక్షణ వంటి అంశాలు ఉంటాయని వివరించారు. ఈ ప్రణాళిక విజయవంతం కావాలంటే కార్మిక మంత్రిత్వ శాఖతో పాటు సంబంధిత రంగాల నియంత్రణ సంస్థలు, ప్రైవేట్‌ కంపెనీలు, సంస్థల మధ్య సమన్వయం, సమర్థవంతమైన భాగస్వామ్యం అవసరమని మంత్రి స్పష్టం చేశారు.

ప్రైవేట్‌ రంగ జాతీయీకరణ చట్టం అమలులో భాగస్వాములైన అన్ని వర్గాలను ఒకే వేదికపైకి తీసుకువచ్చే ఇంటరాక్టివ్‌ డైలాగ్‌ ప్లాట్‌ఫామ్‌గా ఈ సమావేశాలు పనిచేస్తాయని ఆయన తెలిపారు. ప్రైవేట్‌ కంపెనీలు, సంస్థలతో నిరంతర సంప్రదింపులు జరపడం జాతీయీకరణ ప్రణాళిక లక్ష్యాలను సాధించడంలో కీలకమైన అంశమని మంత్రి పేర్కొన్నారు. దీని ద్వారా ప్రైవేట్‌ రంగ సంస్థల్లో జాతీయ కార్మికుల భాగస్వామ్యాన్ని మరింత పెంచే దిశగా చర్యలు తీసుకోనున్నట్లు వెల్లడించారు.