దుబాయ్: యూఏఈ జాతీయ రైలు నెట్‌వర్క్‌లో మరో కీలక ఘట్టం ఆవిష్కృతమైంది. ఎతిహాద్ రైల్‌ దుబాయ్ స్టేషన్‌ను ఈరోజు అధికారికంగా ప్రారంభించారు. దేశవ్యాప్తంగా రైలు ప్రయాణాన్ని మరింత సులభతరం చేయడమే లక్ష్యంగా ఏర్పాటు చేసిన ఈ జాతీయ రైలు నెట్‌వర్క్‌లో ప్రయాణికుల సేవలు సెప్టెంబర్ 30, 2026 నుంచి ప్రారంభం కానున్నాయి.

యూఏఈ అధ్యక్షుడు షేక్ మహమ్మద్ బిన్ జాయెద్ అల్ నహ్యాన్ అబుదాబి నుంచి దుబాయ్‌కు ఎతిహాద్ రైల్‌లో ప్రయాణించి ఈ ప్రాజెక్టు ప్రాముఖ్యతను చాటిచెప్పారు. అనంతరం షేక్ హమ్దాన్ బిన్ మహమ్మద్ బిన్ రషీద్ అల్ మక్తూమ్ మరియు షేక్ థేయాబ్ బిన్ మహమ్మద్ బిన్ జాయెద్ అల్ నహ్యాన్ దుబాయ్ ఎతిహాద్ రైల్ స్టేషన్‌ను అధికారికంగా ప్రారంభించారు.

ప్రారంభ దశలో అబుదాబి, దుబాయ్, ఫుజైరా మధ్య ప్రయాణికుల రైలు సేవలు అందుబాటులోకి రానున్నాయి. దీంతో యూఏఈలోని ప్రధాన నగరాల మధ్య వేగవంతమైన, సౌకర్యవంతమైన రవాణా వ్యవస్థకు మరింత బలం చేకూరనుంది.

ఎతిహాద్ రైల్‌ పూర్తిస్థాయిలో అందుబాటులోకి వస్తే దేశంలోని వివిధ ఎమిరేట్ల మధ్య అనుసంధానం మరింత మెరుగుపడి, ప్రజల ప్రయాణ సమయం తగ్గడంతో పాటు పర్యాటకం, వ్యాపారం, ఆర్థిక కార్యకలాపాలకు కూడా ఊతం లభించనుంది.

యూఏఈ రవాణా రంగంలో ఈ జాతీయ రైలు నెట్‌వర్క్‌ను కీలక మైలురాయిగా భావిస్తున్నారు. దుబాయ్ స్టేషన్ ప్రారంభంతో యూఏఈ భవిష్యత్ రైలు రవాణా వ్యవస్థ కొత్త దశలోకి అడుగుపెట్టింది.