జాజాన్:సౌదీ అరేబియాలోని దక్షిణ జాజాన్ ప్రాంతంలో ఆరుగురు ఇథియోపియా పౌరులను అక్రమంగా తరలిస్తున్న ఓ యెమెన్ వ్యక్తిని అధికారులు అరెస్ట్ చేశారు. జనరల్ డైరెక్టరేట్ ఆఫ్ ముజాహిదీన్‌కు చెందిన పెట్రోల్ బృందాలు ఈ చర్య చేపట్టాయి. సౌదీ అరేబియా సరిహద్దు భద్రతా నిబంధనలను ఉల్లంఘిస్తూ ఇథియోపియా పౌరులను తరలిస్తున్నట్లు గుర్తించి అతడిని అదుపులోకి తీసుకున్నారు.అరెస్టైన ఆరుగురు ఇథియోపియా పౌరులను సంబంధిత అధికారులకు అప్పగించగా, వారిని అక్రమంగా తరలించిన యెమెన్ వ్యక్తిని పబ్లిక్ ప్రాసిక్యూషన్‌కు రిఫర్ చేశారు.

15 ఏళ్ల వరకు జైలు.. SR1 మిలియన్ జరిమానా
సౌదీ అధికారులు హెచ్చరించిన ప్రకారం.. సరిహద్దు భద్రతా నిబంధనలను ఉల్లంఘించి దేశంలోకి ప్రవేశించిన వ్యక్తులకు సహాయం చేయడం, వారిని దేశంలో ఒక ప్రాంతం నుంచి మరో ప్రాంతానికి తరలించడం, ఆశ్రయం కల్పించడం లేదా ఏ రూపంలోనైనా సహాయం, సేవలు అందించడం తీవ్రమైన నేరంగా పరిగణిస్తారు.ఇలాంటి నేరాలకు 15 ఏళ్ల వరకు జైలు శిక్ష, SR1 మిలియన్ వరకు జరిమానా విధించే అవకాశం ఉంది. అంతేకాకుండా, నేరానికి ఉపయోగించిన వాహనం, ఆశ్రయం కల్పించేందుకు ఉపయోగించిన ప్రదేశాన్ని స్వాధీనం చేసుకోవడంతో పాటు బహిరంగంగా అవమానించే శిక్షలు కూడా విధించే అవకాశం ఉందని అధికారులు తెలిపారు. సరిహద్దు భద్రతా ఉల్లంఘనలకు సహకరించే వారిపై కఠిన చర్యలు కొనసాగుతాయని అధికారులు స్పష్టం చేశారు.